Миллий гвардия ҳарбий хизматчилари ва ходимларининг оилаларини ижтимоий қўллаб-қувватлаш ишлари
Тошкент шаҳар Яшнобод туманидаги 339-сонли умумтаълим мактаби биносида Миллий гвардия Тошкент шаҳри бўйича бошқармаси бўлинмалари ҳарбий хизматчилари оила аъзолари иштирокида тадбир ташкил этилди. Тадбирда ёшларни ватанпарварлик руҳида тарбиялаш, хизмат вазифаларини сифатли ва самарали бажаришда оилавий муносабатларнинг ўрни каби долзарб масалалар муҳокама қилинди. Шунингдек, тадбир доирасида сайёр қабул ҳам бўлиб ўтди.
Хусусан, биринчи масала бўйича Ўзбекистон Республикаси Миллий гвардияси Марказий аппарати ҳарбий хизматчилари ва уларнинг оила аъзолари билан ишлаш бўйича масъул подполковник Б. Аширматова "Ватанпарварлик оиладан бошланади" мавзусида маъруза қилди. Ўз нутқида Б. Аширматова тингловчиларга "Ватанпарварлик", у нимани англатиши, нима учун болаларни Ватанга, унинг тарихига, ўтмишига ва буюк аждодларига ҳурмат руҳида тарбиялаш муҳимлиги тўғрисида сўзлади. Иштирокчилар, ўз навбатида, ватанпарварлик руҳидаги тарбия масаласи Ватан ҳимоячилари оилалари учун қанчалик долзарблиги тўғрисида фикр билдиришди.
Шундан сўнг Миллий гвардия шахсий хавфсизлик бошқармасининг катта офицери подполковник Н. Урунбаева интернетдаги қимор ўйинлари ҳақида гапириб, уларнинг хавфи нимада эканлигини тушунтирди. Тингловчиларнинг алоҳида эътибори оиласи ва яқинларининг хавфли ўйинлар кушандасига тушиб қолишининг олдини олиш, шунингдек, инсон виртуал ўйинларга берилиб кетганини қандай аниқлаш ва ундан қутулиши учун қандай чора кўриш кераклигига қаратилди.
Миллий гвардия психологик қўллаб-қувватлаш Марказининг бош мутахассиси Ш.Қурбонова ўз нутқида оиладаги муносабатлар мавзусини кўтариб, можароларнинг олдини олиш, эр-хотиннинг бир-бирини тушуниб, оилавий ҳаётдаги инқирозларни енгиб ўтиши ҳамда ота-онанинг болаларни тарбиялашдаги иштироки қанчалик муҳимлиги ҳақида гапирди.
Тадбир иштирокчиларнинг ижтимоий қўллаб-қувватлаш масалалари бўйича мурожаатларини тинглаш билан якунланди. Бир қатор масалалар жойида ҳал қилиниб, айрим мурожаатлар бўйича мутасаддиларга кўрсатмалар берилди.
