Xabaringiz bor, 2023 yil 12 may kuni davlatimiz Rahbari tomonidan imzolangan O‘zbekiston Respublikasining Maʼmuriy javobgarlik to‘g‘risida”gi kodeksiga o‘zgartirishlar kiritish haqidagi qonunga asosan jamoat tartibini taʼminlash orqali aholining tinch va osuda hayoti uchun shart-sharoitlar yaratish maqsadida Milliy gvardiyaga qo‘shimcha vakolatlar berildi.

Shu munosabat bilan, Milliy gvardiya qo‘mondonligi tomonidan  tizim nomidan maʼmuriy huquqbuzarliklar to‘g‘risidagi ishlarni ko‘rib chiqishga hamda jarima tariqasidagi maʼmuriy jazo choralarini qo‘llashga (vakolatiga ega) masʼul harbiy xizmatchi va xodimlarni huquqiy tayyorgarligini oshirish bo‘yicha o‘quv kurslari tashkil etildi. 

Unga ko‘ra joriy yilning 22 may – 3 iyun kunlari O‘zbekiston Jamoat xavfsizligi universitetida tashkil etilgan tayyorlov kurslarida Milliy gvardiya tizimlarida faoliyat yuritayotgan harbiy xizmatchi va xodimlar o‘zlarining huquqiy bilimlarini oshirdi. Shu bilan bir qatorda, kurslar tizimning hududiy boshqarmalarida xizmat olib borayotgan harbiy xizmatchi va xodimlar uchun ham onlayn tarzda amalga oshirildi.

Tinglovchilar Milliy gvardiya organlariga taalluqli bo‘lgan maʼmuriy huquqbuzarliklar to‘g‘risidagi ishlarni ko‘rib chiqish va yuritish  tartibi bo‘yicha o‘quv dasturiga asosan hamda  qonunda belgilangan maʼmuriy huquqbuzarliklar bo‘yicha ishlarni ko‘rib chiqish vakolati berilgan mansabdor shaxslar bilan o‘quv mashg‘ulotlari o‘tkazish bo‘yicha tuzilgan jadval asosida o‘qitildi.

O‘quv dasturining asosiy maqsadi – tinglovchilarda bilim, ko‘nikma va mahoratni rivojlantirib, yuqori masʼuliyat bilan O‘zbekiston Respublikasi Qurolli Kuchlari va Milliy gvardiyasi oldiga qo‘yilayotgan vazifalarni bajara oladigan, harbiy faoliyat sohasidagi huquqiy-meʼyoriy hujjatlar talablarini biladigan hamda sifatli bajarilishini taʼminlay oladigan harbiy kadrlarni shakllantirishdir.

Tayyorlov kurslari uchun jami 50 soat ajratilib, unda tinglovchilarga darslar maʼruza, amaliy hamda guruh mashg‘ulotlari, munozara, shuningdek, mustaqil tayyorgarlik shaklida o‘tildi hamda amaliy mashg‘ulotlar uchun Ichki ishlar vazirligi, Prokuratura hamda Sud organlaridan mutaxassislar jalb etildi.

O‘quv kurslari yakunida sinov imtihonlaridan muvaffaqiyatli o‘tgan tinglovchilarga belgilangan namunadagi sertifikatlar tantanali topshirildi.