Хабарингиз бор, 2023 йил 12 май куни давлатимиз Раҳбари томонидан имзоланган Ўзбекистон Республикасининг Маъмурий жавобгарлик тўғрисида”ги кодексига ўзгартиришлар киритиш ҳақидаги қонунга асосан жамоат тартибини таъминлаш орқали аҳолининг тинч ва осуда ҳаёти учун шарт-шароитлар яратиш мақсадида Миллий гвардияга қўшимча ваколатлар берилди.

Шу муносабат билан, Миллий гвардия қўмондонлиги томонидан  тизим номидан маъмурий ҳуқуқбузарликлар тўғрисидаги ишларни кўриб чиқишга ҳамда жарима тариқасидаги маъмурий жазо чораларини қўллашга (ваколатига эга) масъул ҳарбий хизматчи ва ходимларни ҳуқуқий тайёргарлигини ошириш бўйича ўқув курслари ташкил этилди. 

Унга кўра жорий йилнинг 22 май – 3 июнь кунлари Ўзбекистон Жамоат хавфсизлиги университетида ташкил этилган тайёрлов курсларида Миллий гвардия тизимларида фаолият юритаётган ҳарбий хизматчи ва ходимлар ўзларининг ҳуқуқий билимларини оширди. Шу билан бир қаторда, курслар тизимнинг ҳудудий бошқармаларида хизмат олиб бораётган ҳарбий хизматчи ва ходимлар учун ҳам онлайн тарзда амалга оширилди.

Тингловчилар Миллий гвардия органларига тааллуқли бўлган маъмурий ҳуқуқбузарликлар тўғрисидаги ишларни кўриб чиқиш ва юритиш  тартиби бўйича ўқув дастурига асосан ҳамда  қонунда белгиланган маъмурий ҳуқуқбузарликлар бўйича ишларни кўриб чиқиш ваколати берилган мансабдор шахслар билан ўқув машғулотлари ўтказиш бўйича тузилган жадвал асосида ўқитилди.

Ўқув дастурининг асосий мақсади – тингловчиларда билим, кўникма ва маҳоратни ривожлантириб, юқори масъулият билан Ўзбекистон Республикаси Қуролли Кучлари ва Миллий гвардияси олдига қўйилаётган вазифаларни бажара оладиган, ҳарбий фаолият соҳасидаги ҳуқуқий-меъёрий ҳужжатлар талабларини биладиган ҳамда сифатли бажарилишини таъминлай оладиган ҳарбий кадрларни шакллантиришдир.

Тайёрлов курслари учун жами 50 соат ажратилиб, унда тингловчиларга дарслар маъруза, амалий ҳамда гуруҳ машғулотлари, мунозара, шунингдек, мустақил тайёргарлик шаклида ўтилди ҳамда амалий машғулотлар учун Ички ишлар вазирлиги, Прокуратура ҳамда Суд органларидан мутахассислар жалб этилди.

Ўқув курслари якунида синов имтиҳонларидан муваффақиятли ўтган тингловчиларга белгиланган намунадаги сертификатлар тантанали топширилди.