OT SPORTI BO‘YICHA RESPUBLIKA OLIY SPORT MAHORATI MAKTABI FAOLIYATIDAGI YANGICHA QADAM
Uzoq yillardan so‘ng ilk marotaba O‘zbekiston Respublikasi Milliy gvardiyasi huzuridagi ot sporti bo‘yicha Respublika oliy sport mahorati maktabida Toshkent shahar chempionati bo‘lib o‘tdi.
Ushbu musobaqa qayta taʼmirlangan va zamonaviy jihozlar o‘rnatilgan maxsus maydonchaning ochilishi munosabati bilan, ot sportining to‘siqlardan sakrash turi bo‘yicha tashkillashtirildi.
Musobaqa mobaynida chavandozlar balandligi 100 sm (bolalar), 110 sm va 120 sm bo‘lgan to‘siqlardan sakrashning uchta toifasi bo‘yicha bellashdilar.
Mazkur chempionatning ochilish marosimida Milliy gvardiya Faxriy qorovul bo‘linmasi bayroqdorlarining ishtiroki sportchilar va tashrif buyurganlarga ko‘tarinki kayfiyat bag‘ishladi.
Qizg‘in va murosasiz kechgan musobaqa natijalariga ko‘ra g‘oliblikni qo‘lga kiritgan chavandoz sportchilar tashkilotchilar tomonidan medal, diplom va esdalik sovg‘alari bilan munosib rag‘batlantirildi.
