Миллий гвардия тизимида кадрлар тайёрлаш масаласи бирламчи вазифалардан бири бўлиб, ҳарбий хизматчи ва ходимларни тайёрлаш, қайта тайёрлаш ва малакасини ошириш ишлари янги босқичга кўтарилмоқда.

Хусусан, жорий йилнинг 3 март кунидаги давлатимиз Раҳбарининг  “Ўзбекистон Республикаси Миллий гвардиясининг ўқув марказлари фаолиятини такомиллаштириш бўйича қўшимча чора тадбирлар тўғрисида”ги Қарорига мувофиқ ташкил этилган Миллий гвардиянинг Қорақалпоғистон Республикаси Минтақавий ўқув маркази ўз иш фаолиятини бошлади.

Бугун янги кўринишда қад ростлаган ва замон талабларига мос равишда жиҳозланган ўқув марказининг тантанали очилиш маросими бўлиб ўтди ва унда Миллий гвардия қўмондони Р.Джураев, Қорақалпоғистон Республикаси   Вазирлар Кенгаши раиси Қ.Сариев, Республика ички ишлар вазири А.Темирханов, прокурор Ф.Аллаберганов, ҳарбий округ кўмондони Ф.Ортиқов, Ўқитувчиларни қайта тайёрлаш маркази директори Б.Диланов ҳамда бир қатор олий таълим муассасалари ректорлари ва мутасадди раҳбарлар иштирок этди.

Тадбир бошида Миллий гвардия қўмондони фойдаланишга топширилаётган мазкур янги Ўқув марказида келгусида Қорақалпоғистон Республикаси, Хоразм, Бухоро ва Навоий вилоятларидан Миллий гвардия, ва бошқа ҳуқуқни муҳофаза қилувчи давлат органлари ходимларини тайёрлаш, қайта тайёрлаш ва уларнинг малакасини ошириш учун хизмат қилишини алоҳида таъкидлади.

Шу билан бирга, яратилган имкониятлардан кенг фойдаланган ҳолда эгалланган билим ва кўникмалар ҳарбий хизматчи ва ходимларнинг келгусида хизмат фаолиятини янада самарали ташкил этишига замин яратишини айтиб ўтди.

Шунингдек, маросим давомида юртимиз тинчлиги ва фуқароларимиз осойишталигини таъминлашда сидқидилдан хизмат қилиб, сафдошларига намуна кўрсатиб келаётган бир гуруҳ ҳарбий хизматчи ва ходимлар, “Ўзбекистон Республикаси мустақиллигининг 30 йиллиги” эсдалик нишони,  “Маънавият аълочиси” ва “Намунали хизматлари учун кўкрак нишонлари”, фахрий ёрлиқ ҳамда муддатидан олдин рағбатлантириш тариқасида навбатдаги махсус унвонлар билан тақдирланди.

Шундан сўнг, меҳмонлар ўқув жараёнини замонавий ахборот ва педагогик технология воситаларидан кенг фойдаланган ҳолда ташкил этиш учун зарур шарт-шароитлар яратилган янги бино билан танишиб чиқди. Жумладан, марказнинг маъмурий ва ўқув бинолари, ётоқхона ҳамда 5 та муҳим ташаббус доирасида жиҳозланган кутубхона ва “IT park” хоналари билан яқиндан танишдилар.

Танишув давомида ёшлар билан учрашув бўлиб ўтди ва ушбу Ўқув марказнинг нафақат ҳуқуқни муҳофаза қилувчи давлат органлари ходимларини тайёрлаш, қайта тайёрлаш ва уларнинг малакасини ошириш учун хизмат қилиши, балки ҳудудий ёшлар билан турли спорт йўналишлари ва касбга йўналтириш бўйича тўгараклар фаолиятини йўлга қўйиш ҳақида кўрсатма берилди.

Миллий гвардия қўмондони томонидан Ўқув марказ ва Олий таълим муассасалари ўртасидаги ҳамкорликни юқори босқичга кўтариб, ўқитувчиларнинг илмий салоҳиятини кучайтиришга ва энг муҳими яратилган шарт-шароитлардан мақсадли фойдаланган ҳолда уюшмаган ва иқтидорли ёшларни жалб қилиб, спортнинг “Қўл жанги, “Бокс”, “Миллий кураш”, Чавандозлик ва шу каби от спорти турлари бўйича мунтазам шуғулланишлари учун малакали спорт усталарини таклиф қилиб барча имкониятлар яратиб берилиши юзасидан мутасадди раҳбарларга топшириқ берилди.

Миллий гвардия Қорақалпоғистон Республикаси бўйича бошқармаси бошлиғи М.Юсупов ва Минтақавий ўқув маркази бошлиғи Б.Утепбергеновлар барча топшириқлар ижроси тўла-тўкис бажарилиши ва мазкур Ўқув маркази ҳар доим олдинда  ва бошқа таълим муассасаларига намуна бўлишини таъминлашларига ваъда бердилар.

Биргина Минтақавий ўқув маркази очилиши мисолида кўрсак,  Мустақиллигимизнинг 30 йиллиги арафасида 14 та янги йирик объектлар хусусан, Қорақолпоғистон Республикасининг ўзида  Шуманай ва Мўйноқ туманларида фойдаланишга топширилган янги бинолар  ҳарбий хизматчи ва ходимларни ҳар томонлама қўллаб-қувватлашга қаратилган муҳим қадамлардан биридир десак муболаға бўлмайди.