Joriy yilning 5 yanvar kuni Qashqadaryo viloyatidagi Milliy gvaardiya boshqarmasi hududida zamonaviy tartibda bunyod etilgan ot sporti majmuasining tantanali ravishda ochilish marosimi bo‘lib o‘tdi. Mazkur tadbirda, Bosh prokuror o‘rinbosari – O‘zbekiston Respublikasi Harbiy prokurori  Sh.Uzoqov,  Milliy gvardiya qo‘mondonining o‘rinbosari S. Mamayusupov, Favqulodda vaziyatlar vazirining o‘rinbosari  K. Abdijalilov, hududiy boshqarma boshliqlari, ommaviy axborot vositalari xodimlari hamda keng jamoatchilik vakillari ishtirok etdilar.

O‘zbekiston Respublikasi Prezidentining 2021 yilning 05 avgust kunidagi “Chavandozlar maktablari faoliyatini tashkil etish chora-tadbirlari to‘g‘risida”gi 5212-sonli qarorida, Milliy gvardiyaning hududiy boshqarmalarida ot sporti seksiyalari faoliyatini tashkil etish masalasi vazifa qilib belgilangan edi. Mazkur qaror ijrosini taʼminlash maqsadida, O‘zbekiston Respublikasi Milliy gvardiyasi Qashqadaryo viloyati bo‘yicha boshqarmasida, zamonaviy turdagi ot sport majmuasi qurilib, viloyatda ot sportini yana-da rivojlantirish va ommalashtirish maqsadida, bugun ushbu ot sport majmuasi foydalanishga  topshirildi.

Bu yerda xizmat otlari bilan mashg‘ulotlar o‘tkazish va ularni boqish hamda parvarishlash uchun barcha shart-sharoitlar yaratilgan.                     

Endilikda ushbu ot sport majmuasida, haftaning har seshanba va juma kunlari ot sportining murabbiylari tomonidan, viloyat yoshlarini ot sportiga bo‘lgan qiziqishlarini oshirish maqsadida, doimiy ravishda mashg‘ulotlar o‘tkazib boriladi.    

Tashkil etilgan ushbu tadbir davomida, “Kamondan o‘q otish” sporti turi  bo‘yicha nishonga aniq otish mashg‘ulotlari, xizmat itlaridan foydalanish usullari hamda harbiy xizmatchilarning ko‘rgazmali chiqishlari barchaga birdek xush kayfiyat ulashdi.  

Tadbirda ishtirok etgan yoshlarga, Yurtimizda bugungi kunda yoshlarga qaratilayotgan eʼtibor davlat siyosati darajasiga ko‘tarilganligi, yaratilgan barcha shart-sharoitlardan unumli foydalanishlari, har bir yigit-qiz jamiyatda o‘z kasbining ustasi bo‘lib yetishishi, milliy arimiyamizning kuch qudrati va salohiyati haqida tushuncha va tavsiyalar berildi. Shuningdek shu yerning o‘zida rahbar va yoshlar uchrashuvi ham tashkil etilib, yoshlarning fikr va mulohazalari tinglandi. Yoshlarning qiziqtirgan savollariga soha mutasaddilari tomonidan javoblar berilib, ularning bilim va ko‘nikmalarini yana-da oshirish maqsadida,   zaruriy kitob to‘plamlari va esdalik sovg‘alari topshrildi.

Bu kabi harbiy vatanparvarlik ruhidagi tadbirlarni tashkil etish, yoshlarning tafakkurida  yurtga sadoqat va ona vatanga muhabbat tuyg‘usini yana-da shakllanishiga xizmat qiladi.