Hurmatli safdoshlar, aziz ayollar va qadrli opa-singillar!

Oila va jamiyat ustuni, hayotimiz fayzi va ko‘rki bo‘lgan ayollarni eʼzozlash, ularga hurmat va ehtirom ko‘rsatish xalqimiz uchun azal-azaldan buyuk qadriyat bo‘lib kelgan.

Yurtimizda bahor nafasi va bayram shukuhi kezib yurgan ayni kunlarda ezgulik va go‘zallik bayrami “8-mart – xalqaro xotin-qizlar kuni” bilan barcha ayol harbiy xizmatchilarni, muhtarama onalarimiz, munis opa-singillarimiz va dilbar qizlarimizni samimiy tabriklab, eng ezgu tilaklarimni izhor etaman.

Bugungi kunda mamlakatimizda xotin-qizlarga munosib eʼtibor qaratilib, ularning davlat va jamiyat hayoti, ilm-fan, taʼlim-tarbiya, tadbirkorlik, ayniqsa harbiy sohada faoliyat olib borayotgani va erkaklardan kam bo‘lmagan natijalarga erishayotgani barchamiz uchun quvonarli holdir.

Muhtaram Prezidentimizning “Maʼlumki, har qanday jamiyat va davlatning qay darajada xalqparvar hamda adolatli ekani uning xotin-qizlarga bo‘lgan munosabati va g‘amxo‘rligi bilan belgilanadi” degan chuqur maʼnoli so‘zlari ayollarimizga eʼtibor va g‘amxo‘rlik ko‘rsatishni insoniy burchimiz ekanligini eslatib turadi.

Milliy gvardiya saflarida mashaqqatli va sharafli burchlarini bajarib, Vatanimiz tinchligi, xalqimiz osoyishtaligini taʼminlashga, jamoat tartibini saqlashga, shuningdek, yosh avlodni vatanparvarlik ruxida tarbiyalash va ularga taʼlim berishga, bizni salomatligimizni asrashga munosib hissa qo‘shayotgan barcha bo‘g‘indagi fidoyi gvardiyachi ayollarimizni, aziz opa singillarimizni xizmatlarini yuksak qadrlaymiz.

Kelgusida ham oila yumushlari, farzand tarbiyasi bilan birga, saflarimizda fidokorona xizmat qilayotgan opa-singillarimizni har tomonlama qo‘llab-quvvatlash, ularni ijtimoiy huquqlarini himoyalash masalasi doimo eʼtiborimiz markazida bo‘ladi.

Siz, aziz va moʻtabar opa-singillarimizni yana bir bor 8-mart Xalqaro xotin-qizlari kuni bayrami bilan chin dildan qutlab, barchangizga sihat-salomatlik, xonadonlaringizga tinchlik-xotirjamlik, fayzu baraka tilayman.

Bayramingiz muborak bo‘lsin!

Hurmat bilan!

Milliy gvardiya qo‘mondoni

general-mayor Djurayev Rustam Mirzayevich