1-iyun – Xalqaro bolalarni himoya qilish kuni
1-iyun – Xalqaro bolalarni himoya qilish kuni munosabati bilan poytaxtimizda O‘zbekiston kasaba uyushmalari Federatsiyasi va Milliy gvardiya hamkorligida “Yangi O‘zbekistonning baxtiyor bolalari” shiori ostida bayram tadbiri tashkil etildi.
Unga Toshkent shahridagi 22- va 30-sonli mehribonlik uylari hamda SOS O‘zbekiston bolalar mahallalari Toshkent filialida tarbiyalanayotgan 500 nafardan ortiq bolajonlar hamda xizmat vazifasini bajarish vaqtida halok bo‘lgan harbiylar va xodimlarning farzandlari taklif etildi.
O‘zbekiston kasaba uyushmalari saroyida bolajonlar harbiy orkestr ijrosidagi kuylar sadosi ostida kutib olindi. Yosh avlod vakillariga peshvoz chiqqan ertak qahramonlari va sirk artistlari ishtirokida tashkil etilgan madaniy tadbir esa bolajonlar quvonchiga yana-da quvonch qo‘shdi. Mazkur tadbirda Oliy Majlisning bola huquqlari bo‘yicha vakili ishtirok etdi.
Shundan so‘ng bolajonlar uchun “Qaldirg‘och” bolalar sanʼat markazi tomonidan maxsus sahnalashtirilgan “Super Qorasoch” musiqali spektakl namoyish etildi. Bolajonlar ushbu ertak orqali ezgulikning yovuzlik ustidan g‘alabasi, oliy maqsad doimo olg‘a intilish ekanligi to‘g‘risida tasavvurga ega bo‘lishdi.
Bolajonlarning keyingi manzili O‘zbekiston Respublikasi Milliy gvardiyasi Jamoat xavfsizligi universiteti bo‘ldi. Ular uchun universitetda dastavval bayramona tushlik tashkil etildi.
Ushbu maskan bo‘ylab tashkil etilgan sayohat davomida o‘g‘il-qizlarga universitetda ochiq eshiklar kuni tashkil etildi. Ular kursantlar tomonidan tayyorlangan turli ko‘rgazmali chiqishlarni tomosha qilishib, bir olam zavq olishdi. Shu bilan birga ular uchun konsert dasturi ham havola etildi.
Bu kabi tadbirlar Respublikamizning turli hududlarida, “Oilaviy bolalar uylari” tarbiyalanuvchilari, maxsus maktab-internatlari o‘quvchilari, xizmat vazifasini bajarish vaqtida halok bo‘lgan harbiylar va xodimlarning farzandlari uchun bayramona tarzda o‘tkazildi.
