1-июнь – Халқаро болаларни ҳимоя қилиш куни
1-июнь – Халқаро болаларни ҳимоя қилиш куни муносабати билан пойтахтимизда Ўзбекистон касаба уюшмалари Федерацияси ва Миллий гвардия ҳамкорлигида “Янги Ўзбекистоннинг бахтиёр болалари” шиори остида байрам тадбири ташкил этилди.
Унга Тошкент шаҳридаги 22- ва 30-сонли меҳрибонлик уйлари ҳамда SOS Ўзбекистон болалар маҳаллалари Тошкент филиалида тарбияланаётган 500 нафардан ортиқ болажонлар ҳамда хизмат вазифасини бажариш вақтида ҳалок бўлган ҳарбийлар ва ходимларнинг фарзандлари таклиф этилди.
Ўзбекистон касаба уюшмалари саройида болажонлар ҳарбий оркестр ижросидаги куйлар садоси остида кутиб олинди. Ёш авлод вакилларига пешвоз чиққан эртак қаҳрамонлари ва цирк артистлари иштирокида ташкил этилган маданий тадбир эса болажонлар қувончига янада қувонч қўшди. Мазкур тадбирда Олий Мажлиснинг бола ҳуқуқлари бўйича вакили иштирок этди.
Шундан сўнг болажонлар учун “Қалдирғоч” болалар санъат маркази томонидан махсус саҳналаштирилган “Супер Қорасоч” мусиқали спектакл намойиш этилди. Болажонлар ушбу эртак орқали эзгуликнинг ёвузлик устидан ғалабаси, олий мақсад доимо олға интилиш эканлиги тўғрисида тасаввурга эга бўлишди.
Болажонларнинг кейинги манзили Ўзбекистон Республикаси Миллий гвардияси Жамоат хавфсизлиги университети бўлди. Улар учун университетда даставвал байрамона тушлик ташкил этилди.
Ушбу маскан бўйлаб ташкил этилган саёҳат давомида ўғил-қизларга университетда очиқ эшиклар куни ташкил этилди. Улар курсантлар томонидан тайёрланган турли кўргазмали чиқишларни томоша қилишиб, бир олам завқ олишди. Шу билан бирга улар учун концерт дастури ҳам ҳавола этилди.
Бу каби тадбирлар Республикамизнинг турли ҳудудларида, “Оилавий болалар уйлари” тарбияланувчилари, махсус мактаб-интернатлари ўқувчилари, хизмат вазифасини бажариш вақтида ҳалок бўлган ҳарбийлар ва ходимларнинг фарзандлари учун байрамона тарзда ўтказилди.
