18 noyabr – O‘zbekiston Respublikasi Davlat bayrog‘i qabul qilingan kun
Bugun jahonning yuksak minbarlarida, dunyo sahnasida, Olimpiya o‘yinlarida g‘oliblikni qo‘lga kiritgan sportchilarimiz, tobora ulkan kuch-qudrat va salohiyat kasb etayotgan harbiylarimiz qo‘lida sarbaland bo‘lgan yurtimiz bayrog‘i har birimizga yuksak g‘urur, faxr-iftixor bag‘ishlaydi. Ana shunday lahzalarda qalblarimizda shu bayroqqa, uning timsolida ona Vatanimizga bo‘lgan cheksiz hurmat, chuqur daxldorlik hisi jo‘sh uradi.
Ayni kunda respublikamizning barcha hududlarida O‘zbekiston Respublikasi Davlat bayrog‘i qabul qilinganligining 30 yillik shodiyonasi keng nishonlanmoqda. Jumladan, Milliy gvardiya Surxondaryo viloyati bo‘yicha boshqarmasi harbiy xizmatchilari tomonidan maktab o‘quvchilari va uyushmagan yoshlar ishtirokida ushbu kunga bag‘ishlab davra suhbatlari, insho va rasmlar tanlovi o‘tkazilib, faol qatnashgan ishtirokchilar munosib taqdirlandi. Shuningdek, Termiz shahri bo‘ylab velomarafon va “besh ming qadam” shiori ostida maqsadli tadbirlar o‘tkazilib kelinmoqda.
