“8-mart – Xalqaro xotin-qizlar kuni” munosabati bilan “Muruvvat” uyida Milliy gvardiya tomonidan tadbir o‘tkazildi
Mehr, muruvvat bu – biz bir-birimizga berishimiz zarur boʻlgan eng muqaddas tuygʻu. Bu tuygʻuni hamma birdek his qiladi. U xoh yosh boʻlsin, xoh keksa, xoh sogʻlom boʻlsin-u xoh xasta.
Farahbaxsh kunlar arafasida internat uyida yashovchi imkoniyati cheklangan fuqarolar holidan xabar olish, maʼnaviy va moddiy qoʻllab – quvvatlash tadbirlarini oʻtkazish tizimda anʼanaga aylangan. Bugun ham ushbu anʼanaga sodiq qolgan holda, Milliy gvardiya harbiy xizmatchi va xodimlari, Maʼnaviyat va maʼrifat markazi ashula va raqs ansambli xonandalari , Jamoat xavfsizligi universiteti kursantlari, Toshkent "Temurbeklar maktabi" harbiy akademik litseyi hamda Harbiy musiqa akademik litseyi oʻquvchilari Sirdaryo tumanidagi "Muruvvat" imkoniyati cheklangan ayollar muassasaga tashrif buyurishdi.
Tashrif davomida taqdir taqozosi bilan intellektual imkoniyati cheklangan yurtdoshlarimizga xushkayfiyat ulashish maqsadida konsert dasturi tashkil etildi. Mehmonlar bilan birgalikda qoʻshiqlar kuylab, raqsga tushgan opa-singillar, munis onajonlar va buvijonlar oʻzlarini ancha bardam his etib, yuzlarida kulgu bilan anchadan buyon bu qadar maʼnaviy hordiq chiqarmaganliklarini soʻzlab berdi.
Shundan soʻng, barcha ishtirokchilar bayram dasturxoni atrofida suhbatlarini davom ettirishdi.
Tadbir yakunida internat uyida istiqomat qiluvchi 250 nafar ayollarga tashkilotchilar tomonidan esdalik sovgʻalari va kiyimlar taqdim etildi.
