“8 – mart Xalqaro xotin-qizlar kuni” munosabati bilan Milliy gvardiya ayol harbiy xizmatchi va ishchi xodimlari uchun bayramona tadbir tashkil etildi
Tantanali marosimda Milliy gvardiya qoʻmondoni general-mayor R.Djurayev, tizimida xizmat qilib kelayotgan fidoyi va jonkuyar opa-singillarimiz, shuningdek turli sohalarda yelkadosh boʻlib kelayotgan dilbar ayollarimizga munosib ehtirom koʻrsatib samimiy tilaklarini bildirdi.
Davlatimiz rahbarining Xalqaro xotin-qizlar kuniga bagʻishlangan tantanali marosimda taʼkidlab oʻtganidek, “Chindan ham, mehr-oqibat, olijanoblik, muhabbat va sadoqat kabi yuksak insoniy qadriyatlarni kamol toptirishda, oila qoʻrgʻonini mustahkamlashda sizlarning xizmatingizni hech narsa bilan qiyoslab boʻlmaydi”
Darhaqiqat bugungi kunda hurmatli ayollarimiz turli soha va tarmoqlarda Vatanimizning jadal taraqqiyoti uchun oʻz hissalarini qoʻshib kelmoqdalar. Xususan, Milliy gvardiya saflarida ham yigitlar bilan bir qatorda, yurtimiz tinchligi va xalqimiz osoyishtaligini taʼminlashdek oliy maqsad yoʻlida xizmat qilib kelayotgan ayol harbiy xizmatchilarimiz, Yangi Oʻzbekiston tayanchi va bunyodkori boʻlgan yosh avlodning tarbiyasida ham jonkuyarlik bilan munosib hissalarini qoʻshib kelmoqdalar.
Bayram munosabati bilan, tizimdagi shu kabi jonkuyar va fidoyi gvardiyachi ayollarning bir guruhi hamda soha rivoji uchun yelkadosh boʻlib kelayotgan dilbar ayollarimiz Milliy gvardiya qoʻmondoni buyrugʻi bilan, idoraviy koʻkrak nishonlari, dastlabki harbiy unvon, faxriy yorliq va esdalik sovgʻalari bilan munosib taqdirlandilar.
