QADIMIY HAMDA HAMISHA NAVQIRON — SAMARQAND SHAHRIGA SAYOHAT TASHKIL ETILDI.
Milliy gvardiya Sirdaryo hamda Samarqand viloyati bo‘yicha boshqarmalari, Yoshlar ittifoqi Sirdaryo va Samarqand viloyatlari Kengashi bilan hamkorlikda Sirdaryo viloyati Baxt shahrida joylashgan Respublika o‘g‘il bolalar o‘quv-tarbiya muassasasi tarbiyalanuvchilari uchun o‘zining boy tarixiy va madaniy merosiga ega bo‘lgan, qadimiy va hamisha navqiron bo‘lmish ko‘hna Samarqand shahriga sayohat tashkil etildi. Samarqand qadimdan o‘zining betakror go‘zalligi, ajoyib ob-havosi, shirin suvi va mazali nonlari bilan dunyoga mashhur shahar bo‘lgan. Oradan qancha asrlar o‘tsa hamki mazkur shahar hali hanuz odamlarni o‘ziga ohangrabodek jalb qilib kelmoqda. Sayohat davomida sayohatchilar navqiron Samarqandning qadimiy tarixi va mustaqillik yillarida barpo etilgan bunyodkorlik majmualari to‘g‘risida katta taassurotlarga ega bo‘ldilar.
Samarqand shahriga sayohatdan cheksiz taassurotlar bilan qaytdik, deydi, muassasa tarbiyalanuvchisi Shohjahon Berdiyorov. Necha yillardan beri Samarqandga borishni qalbimga niyat qilib olgandim. Orzularim amalga oshayotgani esa quvonchimga quvonch qo‘shdi. Bizga qaratilgan eʼtibordan esa juda ham mamnun bo‘ldim.
Sayohat Shoxi zinda yodgorligi ziyorati bilan boshlanib, Amir Temur maqbarasi, Registon ansambli (Sherdor, Tillakori, Mirzo Ulug‘bek madrasalari), Xo‘ja Doniyor ziyoratgohi, Islom Karimov maqbaralari bilan davom etar ekan mazkur tarixiy obidalar, ulardagi naqshinkor bezaklar, ganchkorlik namunalari o‘quvchi yoshlarda katta taassurot qoldirdi. Samarqand shahriga qilingan ziyoratning eng esda qolgani – O‘zbekiston Respublikasi birinchi Prezidenti Islom Karimov dafn etilgan makon va Registon maydoni yonida qad rostlagan yurtboshimiz haykali barcha tarbiyalanuvchilarni hayajonga soldi. Shuningdek sayohatning ikkinchi bosqichi Samarqand viloyati bo‘yicha Milliy gvardiya boshqarmasida bo‘lib, u yerda harbiy xizmatchilar tomonidan tashkil etilgan harbiy texnikalar hamda eng so‘ngi rusumdagi qurol-aslahalar ko‘rgazmasi hamda yosh sportchilar tomonidan tayyorlangan qo‘l jangi usullarida tashkil topgan ko‘rgazmali chiqishlar namoyish etildi. Tashrif davomida yosh sayohatchilarga ko‘plab badiiy kitoblar taqdim etilib, bayramona tushlik dasturxoni tashkil etildi.
