Миллий гвардиянинг Сирдарё ҳамда Самарқанд вилояти бўйича бошқармалари, Ёшлар иттифоқи Сирдарё ва Самарқанд вилоятлари Кенгаши билан ҳамкорликда Бахт шаҳрида жойлашган Республика ўғил болалар ўқув-тарбия муассасаси тарбияланувчилари учун ўзининг бой тарихий ва маданий меросига эга бўлган, қадимий ва ҳамиша навқирон бўлмиш кўҳна Самарқанд шаҳрига саёҳат ташкил этилди.
Самарқанд қадимдан ўзининг бетакрор гўзаллиги, ажойиб об-ҳавоси, ширин суви ва мазали нонлари билан дунёга машҳур шаҳар бўлган. Орадан қанча асрлар ўтса ҳамки мазкур шаҳар ҳали ҳануз одамларни ўзига оҳанграбодек жалб қилиб келмоқда. Саёҳат давомида ёшлар навқирон Самарқанднинг қадимий тарихи ва мустақиллик йилларида барпо этилган бунёдкорлик мажмуалари тўғрисида катта таассуротларга эга бўлдилар.

Самарқанд шаҳрига бўлган саёҳатдан чексиз таассуротлар билан қайтдик, дейди, муассаса тарбияланувчиси Шоҳжаҳон Бердиёров. Неча йиллардан бери Самарқандга боришни қалбимга ният қилиб олгандим. Орзуларим амалга ошаётгани эса қувончимга қувонч қўшди. Бизга қаратилган эътибордан эса жуда ҳам мамнун бўлдим.

Саёҳат Шохи зинда ёдгорлиги зиёрати билан бошланиб, Амир Темур мақбараси, Регистон ансамбли (Шердор, Тиллакори, Мирзо Улуғбек мадрасалари), Хўжа Дониёр зиёратгоҳи, Ислом Каримов мақбаралари билан давом этар экан мазкур тарихий обидалар, улардаги нақшинкор безаклар, ганчкорлик намуналари ўқувчи ёшларда катта таассурот қолдирди. Шунингдек саёҳатнинг иккинчи босқичи Самарқанд вилояти бўйича Миллий гвардия бошқармасида бўлиб, у ерда ҳарбий хизматчилар томонидан ташкил этилган ҳарбий техникалар ҳамда энг сўнги русумдаги қурол-аслаҳалар кўргазмаси ҳамда ёш спортчилар томонидан тайёрланган қўл жанги усуллари билан кўргазмали чиқишлар намойиш этилди. Ташриф давомида ёш саёҳатчиларга кўплаб бадиий китоблар тақдим этилиб, байрамона тушлик дастурхони ташкил этилди.