Aholi muammolarini aniqlash va bartaraf etish hamda kriminogen vaziyat barqarorligini ta’minlash yuzasidan Milliy gvardiya qo‘mondoni general-mayor R.Djurayev boshchiligidagi idoralararo ishchi guruh Navoiy viloyatida o‘rganish ishlarini davom ettirmoqda
Bugun ishchi guruh tomonidan viloyat yoshlarining taʼlim olishi, kasb-hunar o‘rganishi va sport bilan shug‘ullanishlari uchun yaratilgan sharoitlar atroflicha o‘rganildi. Xususan, Milliy gvardiya qo‘mondoni R.Djurayev, Navoiy shahar hokimi M.Egamqulov hamda ishchi guruh aʼzolari Navoiy shahrida joylashgan ixtisoslashtirilgan maktablar va sport majmuasi faoliyati bilan tanishdi.
Tadbir davomida Milliy gvardiya qo‘mondoni 5-sonli ixtisoslashtirilgan maktabda faoliyati yo‘lga qo‘yilgan IT-texnologiyalari, ingliz va xitoy tillarini o‘rganish uchun yaratilgan sharoitlar, kurash bo‘yicha sport to‘garagi, shuningdek, milliy taomlar, tikuvchilik va novvoylik kabi kasb-hunar o‘rgatishga moslashgan guruhlar bilan tanishib, o‘quvchi-yoshlar bilan yaqindan suhbatlashdi. Tashrif so‘ngida, masʼullarga sport majmuasini qo‘shimcha sport anjomlari bilan jihozlash bo‘yicha bir qator taklif va tavsiyalar berildi.
Shundan so‘ng, 1-sonli ixtisoslashtirilgan maktabda Milliy gvardiya tomonidan tashkil etilgan harbiy-vatanparvarlik mashg‘ulotlarini o‘tkazish jarayonida bevosita qo‘mondon ham ishtirok etib, sport seksiyalari faoliyati bilan ham tanishdi. Shu bilan birga, "Yosh gvardiyachilar" doirasida o‘tkazilgan respublika sport musobaqalarida mazkur muassasa o‘quvchilari erishgan yutuqlarining taqdimoti ham bo‘lib o‘tdi.
Uchrashuv oxirida Qo‘mondon tomonidan nomdor sportchilar yetishib chiqayotgan ushbu muassasa sport zali sig‘imi kamligi alohida taʼkidlanib, sport zal yerto‘lasida shug‘ullanib kelayotgan kurashchilar uchun zamonaviy sport inshooti qurish masalasida shahar hokimligi bilan kelishib olindi.
Shuningdek, Milliy gvardiya qo‘mondoni tomonidan ishchi guruhning masʼul vakillari hamda soha xodimlariga yoshlarni taʼlimga yo‘naltirish, ularni yuksak maʼnaviyatli, har tomonlama komil inson bo‘lib ulg‘ayishlari, shu bilan birga, ularni bo‘sh vaqtlarini mazmunli o‘tkazishlari uchun turli sport seksiyalari hamda ommaviy sportga jalb qilishga qaratilgan dasturlarning ijrosi to‘liq taʼminlanishi yuzasidan tegishli vazifalar berildi.
