Milliy gvardiya Harbiy musiqa akademik litseyida “Musiqiy taʼlim va harbiy vatanparvarlik anʼanalarining istiqboli” mavzusida ilk bor xalqaro ilmiy-amaliy konferensiya o‘tkazildi
Mazkur keng ko‘lamli tadbir musiqa va harbiy-vatanparvarlik tarbiyasi yo‘nalishida yetakchi taʼlim muassasalaridan biri bo‘lgan litsey ilmiy-ijodiy faoliyatining 80 yilligiga bag‘ishlandi.
Konferensiyadan ko‘zlangan maqsad litsey tarixining yorqin sahifalarini yoritish, o‘zaro tajriba almashish va musiqa taʼlimi va vatanparvarlik tarbiyasining yangi yo‘nalishlarini muhokama qilishdan iborat bo‘lib, unda Qozog‘iston, Tojikiston, Belorus, Rossiya va Xitoy, AQSH, Janubiy Koreya, Turkiya davlatlaridan ikki yuzdan ortiq ishtirokchilar onlayn hamda oflayn tarzda qatnashdi.
Dastlab konferensiyada Milliy gvardiya qo‘mondonining konferensiya ishtirokchilariga tabrigi qo‘mondon o‘rinbosari polkovnik S.Mamayusupov tomonidan o‘qib eshittirildi.
Tadbirda O‘zbekiston va xorijiy davlatlarning yetakchi olimlari, doktorantlari, tadqiqotchilari, o‘qituvchilarining ishtiroki muhim ahamiyat kasb etib, konferensiyada ishtirokchilarning musiqa taʼlimining dolzarb muammolari, taʼlim jarayonida vatanparvarlik tarbiyasi metodlari haqidagi bir qator maʼruzalari tinglandi.
Shuningdek, ilmiy-amaliy konferensiyada mutaxassislar tomonidan musiqa taʼlimini rivojlantirishning zamonaviy talablari va istiqbolli rejalari, tajribani umumlashtirish va pedagogik malakani oshirish hamda vatanparvarlik tarbiyasining taʼlim jarayoniga integratsiyalashuvi yuzasidan masalalar muhokama qilinib, fikrlar almashildi.
Tadbir so‘ngida xalqaro ilmiy-amaliy konferensiya ishtirokchilariga sertifikatlar hamda esdalik sovg‘alari topshirildi.
