Миллий гвардия Ҳарбий мусиқа академик лицейида “Мусиқий таълим ва ҳарбий ватанпарварлик анъаналарининг истиқболи” мавзусида илк бор халқаро илмий-амалий конференция ўтказилди
Мазкур кенг кўламли тадбир мусиқа ва ҳарбий-ватанпарварлик тарбияси йўналишида етакчи таълим муассасаларидан бири бўлган лицей илмий-ижодий фаолиятининг 80 йиллигига бағишланди.
Конференциядан кўзланган мақсад лицей тарихининг ёрқин саҳифаларини ёритиш, ўзаро тажриба алмашиш ва мусиқа таълими ва ватанпарварлик тарбиясининг янги йўналишларини муҳокама қилишдан иборат бўлиб, унда Қозоғистон, Тожикистон, Белорусь, Россия ва Хитой, АҚШ, Жанубий Корея, Туркия давлатларидан икки юздан ортиқ иштирокчилар онлайн ҳамда офлайн тарзда қатнашди.
Дастлаб конференцияда Миллий гвардия қўмондонининг конференция иштирокчиларига табриги қўмондон ўринбосари полковник С.Мамаюсупов томонидан ўқиб эшиттирилди.
Тадбирда Ўзбекистон ва хорижий давлатларнинг етакчи олимлари, докторантлари, тадқиқотчилари, ўқитувчиларининг иштироки муҳим аҳамият касб этиб, конференцияда иштирокчиларнинг мусиқа таълимининг долзарб муаммолари, таълим жараёнида ватанпарварлик тарбияси методлари ҳақидаги бир қатор маърузалари тингланди.
Шунингдек, илмий-амалий конференцияда мутахассислар томонидан мусиқа таълимини ривожлантиришнинг замонавий талаблари ва истиқболли режалари, тажрибани умумлаштириш ва педагогик малакани ошириш ҳамда ватанпарварлик тарбиясининг таълим жараёнига интеграциялашуви юзасидан масалалар муҳокама қилиниб, фикрлар алмашилди.
Тадбир сўнгида халқаро илмий-амалий конференция иштирокчиларига сертификатлар ҳамда эсдалик совғалари топширилди.
