Amir Temur tavalludining 687 yilligi yurtimizda keng nishonlanmoqda
Amir Temur — o‘zligimizni anglash, milliy anʼana va qadriyatlarimizni tiklash borasidagi ulug‘vor ishlarda xalqimizga maʼnaviy kuch bag‘ishlab kelayotgan ulug‘ siymolardan biridir.
Sohibqiron tavallud topgan kun mamlakatimizda har yili ko‘tarinki ruhda keng nishonlanadi. Bu yil ham ulug‘ sarkarda tavalludining 687 yilligi katta xursandchilik bilan o‘tkazilmoqda.
Anʼanaga ko‘ra, 9 aprel kuni poytaxtimizdagi Amir Temur xiyobonida tantanali marosim bo‘lib o‘tdi. Unda, davlat va jamoat arboblari, shoir va yozuvchilar, olimlar, Qurolli kuchlar kuch tuzilmalari, vazirlik va idoralar vakillari, mahalla faollari, talaba va o‘quvchi yoshlar, keng jamoatchilik, yurtimizda faoliyat ko‘rsatayotgan diplomatik korpus vakillari ishtirok etdi.
Xalqaro Amir Temur xayriya jamoat fondi raisi, O‘zbekiston xalq yozuvchisi Muhammad Ali, Ozarbayjon Respublikasining O‘zbekistondagi Favqulodda va Muxtor elchisi Husayn Guliyev va boshqalar Sohibqiron nafaqat o‘z davridagi eng qudratli davlat asoschisi, ilm-fan, madaniyat va maʼnaviyat homiysi, balki Osiyo va Yevropa qitʼalarida ro‘y bergan tarixiy o‘zgarishlarga hal qiluvchi taʼsir ko‘rsatib, jahon sivilizatsiyasiga beqiyos hissa qo‘shgan Shaxs ekanini taʼkidlashdi.
Milliy gvardiya “Temurbeklar maktabi” o‘quvchilari ham o‘z navbatida, “Temur tuzuklari”dan o‘qib berishdi. Sportchilarimiz o‘zlarining xalqaro arenalarda erishib kelayotgan yutuqlarini faxr bilan hikoya qildi. Qo‘l jangi ustalari bo‘lgan qizlarimiz ham tadbirda o‘z ko‘rgazmali namoyishlari bilan ishtirok etishib, ajdodlarga munosib avlod ekanligini namoyon etishdi. Shuningdek, Milliy gvardiya harbiy orkestri sadolari hamda faxriy qorovul bo‘linmasining qurol bilan saf chiqishlari barchaga bayramona kayfiyat ulashdi.
Tadbir qatnashchilari Amir Temur haykali poyiga Milliy gvardiya faxriy qorovul bo‘linmasi harbiy xizmatchilari hamrohligida gullar qo‘ydilar. Shu jumladan Milliy gvardiya qo‘mondoni o‘rinbosari boshchiligida markaziy devon boshqarma boshliqlari va ofitserlari tomonidan Sohibqiron haykali poyiga gul qo‘yildi.
Shundan so‘ng, barcha mehmonlar Temuriylar tarixi davlat muzeyiga bo‘lib o‘tadigan tadbirlarga taklif etildi.
