O‘zbekiston Respublikasi Milliy gvardiya tasarrufidagi Jamoat xavfsizligi universiteti tomonidan yoshlarni vatanparvarlik, jamiyat hayotiga dahldorlik, ishchanlik ruhida tarbiyalash maqsadida Andijon hamda Namangan viloyatlarida uyushmagan yoshlar ishtirokida "Vatanning sodiq yoshlari" o‘quv- yig‘ini hamda boshqa bir qator maʼnaviy-maʼrifiy tadbirlar o‘tkazilmoqda. Viloyatlarning barcha shahar va tumanlaridan 200 nafarga yaqin yoshlar kutib olinib, joylashtirildi va maxsus harbiy kiyim, oziq-ovqat taʼminoti bilan taʼminlandi.

O‘quv- yig‘ini ikki kun davom etib, unda yoshlar harbiy kasbga yo‘naltirish, huquqiy savodxonlik mashg‘ulotlarida, mehnat yarmarkalari va konsert dasturlarida ishtirok etishlari rejalashtirilgan.

Yig‘inning birinchi kuni ertalabki badantarbiya mashg‘ulotlari bilan boshlandi.

Shundan keyin yoshlarda huquqiy savodxonlikni mustahkamlashga qaratilgan "Yangi tahrirdagi O‘zbekiston Konstitutsiyasining mazmun-mohiyati" va yoshlarda vatanga dahldorlik, vatanparvarlik tuyg‘ularini shakllantirishga qaratilgan "Harbiy-vatanparvarlik orqali yoshlarni vatanga dahldorlik tuyg‘ularini mustahkamlashning ustuvor yo‘nalishlari" mavzularida master klass mashg‘uloti o‘tkazildi. Mashg‘ulotlar davomida viloyat yoshlari mutaxassislarga bir qator qiziqarli va kerakli savollar berib, o‘z faolliklarini namoyon etishdi.

Tadbirlar qizg‘in pallaga kirmoqda, yoshlar har bir mashg‘ulotlarga qiziqish bilan yondashmoqda, harbiy hayotning turli jabhalaridan voqif bo‘lmoqda.