HARBIY XIZMATCHI VA XODIMLARNING FARZANDLARI O‘RTASIDA SPORTNING MINI FUTBOL TURI BO‘YICHA MUSOBAQA O‘TKAZILDI
Joriy yilning 7 oktyabr kuni Milliy gvardiya Maʼnaviyat va maʼrifat markazi hududida joylashgan sport maydonida Milliy gvardiyaning Toshkent shahri va viloyatida joylashgan harbiy qismlari va taʼlim muassasalarida faoliyat yuritayotgan harbiy xizmatchi va xodimlarning farzandlari o‘rtasida sportning mini futbol turi bo‘yicha musobaqa o‘tkazildi.
Yoshlarni sportga jalb etish va sportning futbol turiga bo‘lgan qiziqishini yana-da oshirish hamda sog‘lom dunyo qarashni shakllantirish maqsadida o‘tkazilgan ushbu musobaqada 4 ta jamoa bolalari o‘zaro g‘oliblik uchun kuch sinashishdi.
Qizg‘in va murosasiz o‘tgan sport tadbirida har bir jamoa aʼzolari maydonda mardonavor harakat qildi. Qiziqarli bahslarga boy bo‘lgan musobaqada Milliy gvardiya Toshkent shahar bo‘yicha boshqarmasi harbiy xizmatchilarining farzandlari g‘alabasi bilan yakunlanib, g‘olibga aylandi. Toshkent shahar Qo‘riqlash boshqarmasi xodimlarining farzandlaridan iborat jamoa 2-o‘rinni, Milliy gvardiyaning Qibray tumanida joylashgan brigadasi harbiy xizmatchilari farzandlarining jamoasi esa 3-o‘rinni egalladi.
Musobaqa yakunida g‘olib jamoa tashkilotchilar tomonidan diplom, kubok, medallar va esdalik sovg‘alari bilan rag‘batlantirildi. Bir so‘z bilan aytganda, ushbu kichik sport o‘yinlari kelgusida yetuk sportchilar erishib chiqishiga poydevor bo‘lib xizmat qiladi.
