Milliy gvardiya Harbiy musiqa akademik litseyi hududida yangi o‘quv binosi foydalanishga topshirildi
Harbiy musiqa akademik litseyida "Musiqa nazariyasi, zarbli va estrada cholg‘ulari" yangi o‘quv binosining ochilish marosimi bo‘lib o‘tdi. Marosimda Milliy gvardiya qo‘mondonligi, IIV alohida namunali orkestri masʼul xodimlari, musiqa akademik litseyi faxriy o‘qituvchilari, el suygan bastakor va musiqashunoslar ishtirok etdi.
Rasmiy ochilish marosimidan so‘ng yig‘ilganlar binoda yaratilgan shart-sharoitlar bilan yaqindan tanishdilar. Ushbu yangi binoda o‘quvchilar ixtisoslashgan yangi va zamonaviy zarbli va estrada cholg‘ulari bilan jihozlangan xonalarda malakali mutaxassislardan musiqa sanʼati sirlarini egallashlari mumkin. Binodagi ovoz rejissyorligi uchun maxsus xona esa ovoz muhandisi uchun zarur tizim bilan jihozlangan bo‘lib, bu o‘quvchilarga yuqori sifatli audio yozuvlarini yaratish imkonini beradi.
Ikkinchi qavatda musiqa nazariy fanlari – solfejio, garmoniya, musiqa adabiyoti va maqom alifbo bo‘limlari xonalari, xor sinflari joylashgan. Innovatsion kabinet interfaol multimediali doska bilan jihozlangan bo‘lib, davra suhbatlari, ochiq darslar, viktorinalar, mahorat darslar o‘tkazish uchun qulay.
Har bir sinf uchun ko‘rgazmali qurollar tizimi har tomonlama o‘ylangan bo‘lib, bu o‘quvchilarga darsda olingan maʼlumotlarni yaxshiroq tushunish imkonini beradi. Zamonaviy qulay o‘quv xonalari, mebel va eng yangi texnologiyalar bilan jihozlangan. Bu barchasi o‘qituvchilar uchun yaxshi mehnat sharoiti yaratish, navqiron avlodga sifatli taʼlim-tarbiya berishga qaratilgan.
Shundan so‘ng litsey o‘quvchilari tomonidan tayyorlangan konsert dasturi yig‘ilganlar eʼtiboriga havola etilib, yosh iqtidorlar tomonidan ijro etilgan jahon va milliy musiqa namunalari konsert dasturiga ko‘tarinki ruh baxsh etdi.
