Миллий гвардия Ҳарбий мусиқа академик лицейи ҳудудида янги ўқув биноси фойдаланишга топширилди
Ҳарбий мусиқа академик лицейида "Мусиқа назарияси, зарбли ва эстрада чолғулари" янги ўқув биносининг очилиш маросими бўлиб ўтди. Маросимда Миллий гвардия қўмондонлиги, ИИВ алоҳида намунали оркестри масъул ходимлари, мусиқа академик лицейи фахрий ўқитувчилари, эл суйган бастакор ва мусиқашунослар иштирок этди.
Расмий очилиш маросимидан сўнг йиғилганлар бинода яратилган шарт-шароитлар билан яқиндан танишдилар. Ушбу янги бинода ўқувчилар ихтисослашган янги ва замонавий зарбли ва эстрада чолғулари билан жиҳозланган хоналарда малакали мутахассислардан мусиқа санъати сирларини эгаллашлари мумкин. Бинодаги овоз режиссёрлиги учун махсус хона эса овоз муҳандиси учун зарур тизим билан жиҳозланган бўлиб, бу ўқувчиларга юқори сифатли аудио ёзувларини яратиш имконини беради.
Иккинчи қаватда мусиқа назарий фанлари – сольфежио, гармония, мусиқа адабиёти ва мақом алифбо бўлимлари хоналари, хор синфлари жойлашган. Инновацион кабинет интерфаол мультимедиали доска билан жиҳозланган бўлиб, давра суҳбатлари, очиқ дарслар, викториналар, маҳорат дарслар ўтказиш учун қулай.
Ҳар бир синф учун кўргазмали қуроллар тизими ҳар томонлама ўйланган бўлиб, бу ўқувчиларга дарсда олинган маълумотларни яхшироқ тушуниш имконини беради. Замонавий қулай ўқув хоналари, мебель ва энг янги технологиялар билан жиҳозланган. Бу барчаси ўқитувчилар учун яхши меҳнат шароити яратиш, навқирон авлодга сифатли таълим-тарбия беришга қаратилган.
Шундан сўнг лицей ўқувчилари томонидан тайёрланган концерт дастури йиғилганлар эътиборига ҳавола этилиб, ёш иқтидорлар томонидан ижро этилган жаҳон ва миллий мусиқа намуналари концерт дастурига кўтаринки руҳ бахш этди.
