Avval xabar berganimizdek, aholi muammolarini aniqlash va ularni bartaraf etish hamda kriminogen vaziyat barqarorligini taʼminlash maqsadida, Milliy gvardiya qo‘mondoni general-mayor R.Djurayev boshchiligidagi idoralararo ishchi guruh hafta davomida Buxoro viloyatida o‘rganish ishlarini olib bordi
Bugun Buxoro viloyati hokimligi binosida Ishchi guruh tomonidan o‘rganish chog‘ida aniqlangan aholini qiynab kelayotgan muammolar va ularni hal etish ishlari natijalari sarhisob qilindi, shuningdek, bajarilishi lozim bo‘lgan hamkorlikdagi ishlar bo‘yicha yo‘l xaritasi ishlab chiqqan holda, tizimli chora-tadbirlar amalga oshirish yuzasidan topshiriqlar berildi.
Chunonchi, hafta davomida Ishchi guruh tashabbusi bilan viloyat hududida jami 19227 ta xonadonga suyultirilgan gaz baloni yetkazilib, 113 ta mahallani tabiiy gaz bilan uzluksiz taʼminlash yo‘lga qo‘yildi, 13,45 km ichimlik suvi hamda 0,86 km tabiiy gaz tarmoqlari taʼmirlandi, 116,8 ming m2 (15,5 km) ichki yo‘llarga shag‘al yotqizildi, 116 ta maktab va 104 ta maktabgacha taʼlim muassasasi, shuningdek, 58 ta talabalar turar joyi isitish tizimlarining holati o‘rganildi.
Isteʼmol bozorlaridagi narx-navo barqarorligini taʼminlash, oziq-ovqat zaxiralarini hamda tadbirkorlar uchun yanda qulay sharoitlar yaratish maqsadida, viloyatda 56 ta arzonlashtirilgan yarmarka tashkil etilib, ularda jami 323 tonna kundalik ehtiyoj isteʼmol tovarlari savdoga qo‘yildi. Shuningdek, o‘z mahsulotini to‘g‘ridan-to‘g‘ri sotish istagida bo‘lgan 38 ta fermer xo‘jaligi egalariga o‘z mahallalarida qishloq xo‘jaligi mahsulotlarini sotish uchun savdo rastalari tashkil etishga ko‘maklashildi.
Ishsizlik va kambag‘allikni qisqartirish, oilaviy tadbirkorlik hamda yoshlar va ayollarning tashabbuskor loyihalariga ko‘maklashish maqsadida, viloyat hududida joylashgan barcha monomarkazlar, mehnat yarmarkalari, kovorking markazlari faoliyatining natijadorligi o‘rganilib, natijasi bo‘yicha 335 nafar fuqaro doimiy ish o‘rinlariga joylashtirildi, 201 nafari kasbga o‘qitishga yuborildi, 118 nafariga ishsizlik nafaqasi tayinlandi. Shuningdek, 105 nafar fuqarolar o‘zini-o‘zi band qilish, 2 nafari yakka tartibdagi tadbirkorlik qilish orqali mehnatga jalb etildi.
Shu bilan birga, o‘tkazilgan sayyor qabullar davomida fuqarolardan kelib tushgan 533 ta murojaatdan 217 tasi ijobiy hal etilib, 316 tasi nazoratga olindi.
Viloyat hududida harakat xavfsizligini taʼminlash, yo‘lovchi va haydovchilarga qulayliklar yaratish maqsadida qo‘shimcha ravishda 50 ta yo‘l belgilari o‘rnatilib, 43 ta svetofor taʼmirlandi hamda 34 ta joyda yo‘l belgilarini tiklash kabi boshqa bir qator ishlar amalga oshirildi.
Bundan tashqari, 30 ta sanoat obyektlari texnik qo‘riqlovga olinib, 30 ta xonadon, 19 ta olis hududlarda joylashgan obyektlarda signalizatsiya tizimlari o‘rnatildi.
Shuningdek, mahallalarda aholining murojaatlari bilan ishlash ahvoli va ularni qanoatlantirish darajasi tanqidiy o‘rganilib, bugungi kunda jami 43 ta mahalla fuqarolar yig‘inlarida 1093 ta sayyor davlat xizmatlari ko‘rsatilishi taʼminlandi.
