BAYRAM ARAFASIDA AYOLLAR “MURUVVAT” UYIGA TASHRIF BUYURILDI
Mehr, muruvvat hamda saxovat eng muqaddas tuyg‘ulardir. Shu bois bayram munosabati bilan mehr-muruvvat uylarida mehnat qilayotgan hamda ushbu maskandagi boshqalardan salomatlik jihatidan ajralib turadigan ayollarimiz holidan xabar olish maqsadida Milliy gvardiya Buxoro viloyati bo‘yicha boshqarmasi harbiy xizmatchi va xodimalari Buxoro shahar ayollar “Muruvvat” uyiga tashrif buyurishdi.
Tashrif davomida qalblari pok fidoiy shifokorlarga hamda muruvvat uyida yashovchi xotin-qizlarga taqdim etilgan gullar hamda esdalik sovg‘alar ularni ezgu faoliyatlarini davom ettirishida yana-da rag‘bat bo‘ldi desak, hech mubolag‘a bo‘lmaydi.
Taʼkidlash joizki, bu maskandagilar boshqalardan nafaqat salomatlik jihatidan, balki mehr-muruvvatga tashnaliklari bilan ham ajralib turadi. Ularning baʼzilari nogironligi bo‘lgan, jismonan o‘zgalar ko‘magiga muhtoj ayollardir. Tadbirda, muruvvat uyida istiqomat qiluvchi 255 nafar ayollar hamda tibbiyot xodimlariga sovg‘alar bilan bir qatorda, oziq-ovqat to‘plamlari, sanitariya-gigiyena vositalari va kiyim-kechaklar taqdim etildi.
Mazkur tadbirda Buxoro viloyati hokimi va Milliy gvardiya boshqarmasi boshlig‘i nozik xilqat vakillarini bayram bilan muborakbod etib, samimiy tilaklarini bildirdilar. Tadbir xotin-qizlari uchun namoyish etilgan konsert dasturi va bezatilgan bayram dasturxoni bilan davom etdi.
