БАЙРАМ АРАФАСИДА "АЁЛЛАР МУРУВВАТ УЙИ"ГА ТАШРИФ БУЮРИЛДИ
Меҳр, мурувват ҳамда саховат энг муқаддас туйғулардир. Шу боис байрам муносабати билан меҳр-мурувват уйларида меҳнат қилаётган ҳамда ушбу маскандаги бошқалардан саломатлик жиҳатидан ажралиб турадиган аёлларимиз ҳолидан хабар олиш мақсадида Миллий гвардия Бухоро вилояти бўйича бошқармаси ҳарбий хизматчи ва ходималари Бухоро шаҳар аёллар "Мурувват" уйига ташриф буюришди.
Ташриф давомида қалблари пок фидоий шифокорларга ҳамда мурувват уйида яшовчи хотин-қизларга тақдим этилган гуллар ҳамда эсдалик совғалар уларни эзгу фаолиятларини давом эттиришида янада рағбат бўлди десак, ҳеч муболаға бўлмайди.
Таъкидлаш жоизки, бу маскандагилар бошқалардан нафақат саломатлик жиҳатидан, балки меҳр-мурувватга ташналиклари билан ҳам ажралиб туради. Уларнинг баъзилари ногиронлиги бўлган, жисмонан ўзгалар кўмагига муҳтож аёллардир. Тадбирда, мурувват уйида истиқомат қилувчи 255 нафар аёллар ҳамда тиббиёт ходимларига совғалар билан бир қаторда, озиқ-овқат тўпламлари, санитария-гигиена воситалари ва кийим-кечаклар тақдим этилди.
Мазкур тадбирда Бухоро вилояти ҳокими ва Миллий гвардия бошқармаси бошлиғи нозик хилқат вакилларини байрам билан муборакбод этиб, самимий тилакларини билдирдилар. Тадбир хотин-қизлари учун намойиш этилган концерт дастури ва безатилган байрам дастурхони билан давом этди.
