BANDLIKNI TAʼMINLASH BO‘YICHA MEMORANDUM IMZOLANDI
Aholi bandligini taʼminlash ayniqsa xotin-qizlar va yoshlarni iqtidoridan kelib chiqqan holda ularni kasb hunarga yo‘naltirish borasida joylarda Milliy gvardiya masʼul xodimlari hamkor vazirlik va tashkilotlar bilan birgalikda zarur chora tadbirlarni amalga oshirib kelmoqdalar.
Xususan, Namangan shahrida viloyatning “Nodirabegim” nomidagi viloyat axborot-kutubxona markazida xotin-qizlar bilan viloyatdagi maʼnaviyat targ‘ibotchilari va yozuvchilar ishtirokida madaniy tadbir o‘tkazildi. Mazkur tadbirda ayollarning gender tengligi va bu borada davlatimiz rahbari eʼtibor markazida bo‘lgan vazifalar ijrosi yuzasidan ochiq muloqot bo‘lib o‘tdi.
Bo‘lib o‘tgan mazkur tadbirda xotin-qizlarning murojaat va takliflaridan kelib chiqib, ularni ish bilan taʼminlash uchun Respublika bandlik va mehnat munosabatlari vazirligi tizimidagi Namangan viloyati “Ishga marhamat” monomarkazi davlat muassasasiga tashrif buyurildi. Bu yerda mutaxassislar bilan bo‘lib o‘tgan uchrashuv mobaynida xotin-qizlarni o‘qitish hamda malakasini oshirish borasidagi mavjud imkoniyatlar bilan tanishtirildi.
Shuningdek, mazkur monomarkaz rahbari hamda Milliy gvardiya Namangan viloyati bo‘yicha boshqarmasi boshlig‘i tomonidan mehnat sohasida faol aloqalarni o‘rnatish, harbiy xizmatchi va xodimlarning oila aʼzolarini bandligini taʼminlash va rivojlantirish maqsadida Memorandum imzolandi.
Shundan so‘ng, Namangan shahridagi 30 nafar uyushmagan yoshlarni kasbga yo‘naltirish va ularni bandligini taʼminlash maqsadida “Ideal” kiyim tikuv korxonasiga ekskursiya tashkil etildi.
Bu yerda yoshlarning qiziqtirgan savollariga mutaxassislar tomonidan aniq tushunchalar berish bilan birga, shu yerning o‘zida ularni shu sohaga qiziqtirish maqsadida trening mashg‘uloti o‘tkazildi.
