BARCHA SAʼY-HARAKATLAR INSON QADRI UCHUN
Joriy yilning 30 noyabr kuni Milliy gvardiya qo‘mondoni general-mayor R.Djurayev raisligida “O‘zbekiston Respublikasi jamoat xavfsizligi konsepsiyasini tasdiqlash va uni amalga oshirish chora-tadbirlari to‘g‘risida”gi O‘zbekiston Respublikasi Prezidenti Farmonining ijrosiga qaratilgan video-selektor yig‘ilishi bo‘lib o‘tdi.
Mazkur Farmonni mazmun-mohiyatini shaxsiy tarkibga yetkazish maqsadida o‘tkazilgan ushbu yig‘ilishda Milliy gvardiya qo‘mondoni o‘rinbosarlari, Markaziy devonning boshqarma, xizmat va bo‘lim boshliqlari, harbiy qism va taʼlim muassasalar, shuningdek barcha tarkibiy va hududiy bo‘linmalarning mutasaddi rahbarlari, ofitserlar hamda serjantlar tarkibi ishtirok etishdi.
Yig‘ilish mobaynida Milliy gvardiya qo‘mondoni tomonidan mazkur farmonda belgilab berilgan aniq vazifalar va maqsadli yo‘nalishlar tushuntirilib, mamlakatimizda amalga oshirilayotgan keng ko‘lamli islohotlar doirasida aholining tinch va osoyishta hayotini taʼminlash hamda jamiyatimizda qonunga itoatkorlik va jamoat xavfsizligi madaniyatini shakllantirishga alohida eʼtibor qaratilayotganligi, xususan jamoat xavfsizligini taʼminlash yo‘nalishidagi ishlarni “Xalq manfaatlariga xizmat qilish” tamoyili asosida tashkil etishning mutlaqo yangi mexanizm va tartiblari joriy etilib, davlat organlarining jamoatchilik tuzilmalari bilan o‘zaro maqsadli hamkorligi yo‘lga qo‘yilganligi taʼkidlandi.
Shuningdek, Farmon ijrosi yuzasidan ishlab chiqilgan, konsepsiya va yo‘l xaritalarida ko‘rsatilgan chora-tadbirlarning belgilangan muddatlarda bajarilishi hamda ushbu yo‘nalishdagi ishlarni hamkor vazirliklar bilan birgalikda amalga oshirilishi yuzasidan tegishliligi bo‘yicha mutasaddi rahbarlarga topshiriqlar berildi.
Yig‘ilishda so‘z olganlar davlatimiz rahbari tomonidan qabul qilingan mazkur Farmonning tarixiy ahamiyatiga urg‘u berib, ushbu yangicha tizim Milliy gvardiya harbiy xizmatchilariga katta masʼuliyat yuklashini xis qilgan holda, yurt tinchligi, xalqimiz osoyishtaligi va fuqarolarimiz xavfsizligini taʼminlashdek sharafli vazifalarni bajarishda bor kuch-g‘ayratlarini safarbar etib, sadoqat bilan xizmat qilishlarini bildirishdi.
Milliy gvardiya qo‘mondoni o‘z navbatida, mazkur tarixiy Farmon bilan Milliy gvardiya zimmasiga yuklatilgan keng ko‘lamli vazifalar ijrosi, joylarda harbiy xizmatchi va xodimlarimiz tomonidan “Barcha saʼy-harakatlar inson qadri uchun” degan ustuvor g‘oya asosida amalga oshirilishiga ishonch bildirdi.
