БАРЧА САЪЙ-ҲАРАКАТЛАР ИНСОН ҚАДРИ УЧУН
Жорий йилнинг 30 ноябрь куни Миллий гвардия қўмондони генерал-майор Р.Джураев раислигида “Ўзбекистон Республикаси жамоат хавфсизлиги концепциясини тасдиқлаш ва уни амалга ошириш чора-тадбирлари тўғрисида”ги Ўзбекистон Республикаси Президенти Фармонининг ижросига қаратилган видео-селектор йиғилиши бўлиб ўтди.
Мазкур Фармонни мазмун-моҳиятини шахсий таркибга етказиш мақсадида ўтказилган ушбу йиғилишда Миллий гвардия қўмондони ўринбосарлари, Марказий девоннинг бошқарма, хизмат ва бўлим бошлиқлари, ҳарбий қисм ва таълим муассасалар, шунингдек барча таркибий ва ҳудудий бўлинмаларнинг мутасадди раҳбарлари, офицерлар ҳамда сержантлар таркиби иштирок этишди.
Йиғилиш мобайнида Миллий гвардия қўмондони томонидан мазкур фармонда белгилаб берилган аниқ вазифалар ва мақсадли йўналишлар тушунтирилиб, мамлакатимизда амалга оширилаётган кенг кўламли ислоҳотлар доирасида аҳолининг тинч ва осойишта ҳаётини таъминлаш ҳамда жамиятимизда қонунга итоаткорлик ва жамоат хавфсизлиги маданиятини шакллантиришга алоҳида эътибор қаратилаётганлиги, хусусан жамоат хавфсизлигини таъминлаш йўналишидаги ишларни “Халқ манфаатларига хизмат қилиш” тамойили асосида ташкил этишнинг мутлақо янги механизм ва тартиблари жорий этилиб, давлат органларининг жамоатчилик тузилмалари билан ўзаро мақсадли ҳамкорлиги йўлга қўйилганлиги таъкидланди.
Шунингдек, Фармон ижроси юзасидан ишлаб чиқилган, концепция ва йўл хариталарида кўрсатилган чора-тадбирларнинг белгиланган муддатларда бажарилиши ҳамда ушбу йўналишдаги ишларни ҳамкор вазирликлар билан биргаликда амалга оширилиши юзасидан тегишлилиги бўйича мутасадди раҳбарларга топшириқлар берилди.
Йиғилишда сўз олганлар давлатимиз раҳбари томонидан қабул қилинган мазкур Фармоннинг тарихий аҳамиятига урғу бериб, ушбу янгича тизим Миллий гвардия ҳарбий хизматчиларига катта масъулият юклашини хис қилган ҳолда, юрт тинчлиги, халқимиз осойишталиги ва фуқароларимиз хавфсизлигини таъминлашдек шарафли вазифаларни бажаришда бор куч-ғайратларини сафарбар этиб, садоқат билан хизмат қилишларини билдиришди.
Миллий гвардия қўмондони ўз навбатида, мазкур тарихий Фармон билан Миллий гвардия зиммасига юклатилган кенг кўламли вазифалар ижроси, жойларда ҳарбий хизматчи ва ходимларимиз томонидан “Барча саъй-ҳаракатлар инсон қадри учун” деган устувор ғоя асосида амалга оширилишига ишонч билдирди.
