Bayram arafasida munosib tuhfa. Mirzo Ulug‘bek tumani Qo‘riqlash bo‘limining yangi binosi foydalanishga topshirildi
O‘zbekiston Respublikasi Qurolli Kuchlari tashkil topganligining 31 yilligi hamda "14-yanvar Vatan himoyachilari kuni" munosabati bilan barcha kuch tuzilmalari, huquqni muhofaza qiluvchi organlarning shaxsiy tarkibi ishtirokida "Milliy armiyamiz – Yangi O‘zbekistonning mustahkam qalqonidir!" shiori ostida tadbirlar o‘tkazilmoqda. Sana arafasida harbiy xizmatchilar va xodimlarining ish sharoitini yaxshilash va zamon bilan hamnafas faoliyat yuritishlari uchun innovatsion texnologiyalar bilan jihozlangan maʼmuriy inshootlar qurib foydalanishga topshirilmoqda. Milliy gvardiya Qo‘riqlash bosh boshqarmasi Toshkent shahar Mirzo Ulug‘bek tumani bo‘limi xodimlari uchun ham qisqa fursatda barcha qulayliklarga ega, shinam xizmat binosi yangidan qayta taʼmirdan chiqarildi. Ushbu maʼmuri inshootning ochilish marosimida Milliy gvardiya qo‘mondoni general-mayor R.Djurayev, Mirzo Ulug‘bek tumani hokimi Sh.Ergashev, Toshkent shahar hokimligi mutasaddi vakillari hamda harbiy xizmatchi va xodimlar ishtirok etishdi. Tadbirda Milliy gvardiya qo‘mondoni so‘zga chiqib, so‘nggi yillarda olib borilgan islohotlar natijasida qo‘riqlash xizmati faoliyati takomillashib, sohaga bir qator yangiliklar kiritilganligini taʼkidladi va barchani 14 yanvar – Vatan himoyachilari kuni bilan muborakbod etdi.
Shuningdek, bir qator xodimlarga Milliy gvardiya qo‘mondoni buyrug‘i bilan navbatdagi maxsus unvonlar va rag‘batlantiruvchi mukofotlar topshirildi. Shu bilan birga mazkur binoning qurilish taʼmirlash ishlarida o‘z yordamini ko‘rsatgan tuman hokimi va quruvchilarga qimmatbaho esdalik sovg‘alari taqdim etildi.
Shundan so‘ng anʼanaga ko‘ra ramziy lenta kesilib, mehmonlarga binoda xodimlarning xizmat olib borishlari uchun yaratilgan sharoitlar bilan tanishtirildi. Axborot tahlil va monitoring, maʼnaviyat va maʼrifat, ruhiy yengillashtirish, zamonaviy innovatsion texnologiyalar xonalari shular jumlasidan. Bundan tashqari xodimlarning jangovar va jismoniy tayyorgarligi uchun ham elektron tir va sport zali barpo etilgan.
