Байрам арафасида муносиб туҳфа. Мирзо Улуғбек тумани Қўриқлаш бўлимининг янги биноси фойдаланишга топширилди
Ўзбекистон Республикаси Қуролли Кучлари ташкил топганлигининг 31 йиллиги ҳамда "14-январь Ватан ҳимоячилари куни" муносабати билан барча куч тузилмалари, ҳуқуқни муҳофаза қилувчи органларнинг шахсий таркиби иштирокида "Миллий армиямиз – Янги Ўзбекистоннинг мустаҳкам қалқонидир!" шиори остида тадбирлар ўтказилмоқда. Сана арафасида ҳарбий хизматчилар ва ходимларининг иш шароитини яхшилаш ва замон билан ҳамнафас фаолият юритишлари учун инновацион технологиялар билан жиҳозланган маъмурий иншоотлар қуриб фойдаланишга топширилмоқда. Миллий гвардия Қўриқлаш бош бошқармаси Тошкент шаҳар Мирзо Улуғбек тумани бўлими ходимлари учун ҳам қисқа фурсатда барча қулайликларга эга, шинам хизмат биноси янгидан қайта таъмирдан чиқарилди. Ушбу маъмури иншоотнинг очилиш маросимида Миллий гвардия қўмондони генерал-майор Р.Джураев, Мирзо Улуғбек тумани ҳокими Ш.Эргашев, Тошкент шаҳар ҳокимлиги мутасадди вакиллари ҳамда ҳарбий хизматчи ва ходимлар иштирок этишди. Тадбирда Миллий гвардия қўмондони сўзга чиқиб, сўнгги йилларда олиб борилган ислоҳотлар натижасида қўриқлаш хизмати фаолияти такомиллашиб, соҳага бир қатор янгиликлар киритилганлигини таъкидлади ва барчани 14 январь – Ватан ҳимоячилари куни билан муборакбод этди.
Шунингдек, бир қатор ходимларга Миллий гвардия қўмондони буйруғи билан навбатдаги махсус унвонлар ва рағбатлантирувчи мукофотлар топширилди. Шу билан бирга мазкур бинонинг қурилиш таъмирлаш ишларида ўз ёрдамини кўрсатган туман ҳокими ва қурувчиларга қимматбаҳо эсдалик совғалари тақдим этилди.
Шундан сўнг анъанага кўра рамзий лента кесилиб, меҳмонларга бинода ходимларнинг хизмат олиб боришлари учун яратилган шароитлар билан таништирилди. Ахборот таҳлил ва мониторинг, маънавият ва маърифат, руҳий енгиллаштириш, замонавий инновацион технологиялар хоналари шулар жумласидан. Бундан ташқари ходимларнинг жанговар ва жисмоний тайёргарлиги учун ҳам электрон тир ва спорт зали барпо этилган.
