Tibbiyot xodimlari kuni munosabati bilan tantanali tadbir bo‘lib o‘tdi
Mazkur marosimga shifokorlar hamda hamshiralarni kasb bayrami bilan qutlash uchun Respublika Sog‘liqni saqlash vazirining o‘rinbosarlari Ulug‘bek Sabirov va Elmira Bositxonova, Milliy gvardiya tibbiyot boshqarmalari, tibbiy va sanitariya-epidemiologiya xizmatlari vakillari, Mudofaa, Ichki ishlar vazirliklari, Davlat xavfsizlik xizmati va boshqa idoralar soha vakillari, harbiy xizmatchilar, Milliy gvardiya faxriylari va ularning oila aʼzolari hamda sog‘liqni saqlash tashkilotlaridan vakillar tashrif buyurdi.
Tadbirni Milliy gvardiya qo‘mondoni o‘rinbosari polkovnik Sarvar Mamayusupov kirish so‘zi bilan ochib berdi.
Unda tibbiyot xodimlarining harbiy xizmatchilar salomatligini asrashga qo‘shgan ulkan hissalari eʼtirof etilib, qo‘mondonlik va shaxsiy tarkib nomidan bayram tabrigi o‘qib eshittirildi.
Shundan so‘ng, bir qator tibbiyot xodimlariga II va III darajali "Namunali xizmatlari uchun" ko‘krak nishonlari, esdalik qo‘l soatlari, faxriy yorliqlar
hamda uch nafar tibbiyot punkti boshliqlariga maxsus tez tibbiy yordam avtomashinalari kalitlari tantanali ravishda topshirildi.
Shu bilan bir qatorda, Milliy gvardiya ansambli xonandalari tomonidan ijro etilgan kuy-qo‘shiqlar barchaga bayramona kayfiyat ulashdi.
Taʼkidlash joizki, Davlatimiz rahbari tomonidan joriy yilning 25 aprelda "Aholiga ko‘rsatilayotgan birlamchi tibbiy-sanitariya yordamining sifatini yaxshilash, tibbiyot xodimlarini qo‘llab-quvvatlash va faoliyati samaradorligini oshirish to‘g‘risida"gi qarori ijrosi yuzasidan tizimda keng qamrovli ishlar amalga oshirilmoqda.
Xususan, yil mobaynida jami 52 mingga yaqin (7985 nafar harbiy xizmatchi, 19187 nafar xodim, 24814 nafar oila aʼzolari) harbiy xizmatchi va xodimlar hamda ularning oila aʼzolari chuqurlashtirilgan tibbiy ko‘rikdan o‘tkazilganligi fikrimizning isbotidir.
