O‘QUVCHILAR O‘RTASIDA BOKS BO‘YICHA XOTIRA TURNIRI
Mamlakatimizda yoshlarning boks sport turiga bo‘lgan ommaviy qiziqishini inobatga olib, iqtidorli sportchilarni aniqlash, tanlash va saralash (seleksiya) tizimini yana-da takomillashtirish, ular orasida sog‘lom raqobat va musobaqa muhitini yaratish, shuningdek, o‘zbek boksining dunyodagi yetakchiligini saqlab qolish va davom ettirish maqsadida muntazam ravishda musobaqalar o‘tkazilmoqda.
Xususan, Sirdaryo viloyatining Baxt shahrida joylashgan Respublika o‘g‘il bolalar o‘quv-tarbiya muassasasida O‘zbekiston Respublikasi Milliy gvardiyasi tasarrufidagi o‘quv muassasalari o‘quvchilari hamda Toshkent shahridagi 22 va 23-sonli mehribonlik uyi tarbiyalanuvchilari o‘rtasida sportning boks turi bo‘yicha “9 may – Xotira va qadrlash kuni”ga bag‘ishlangan turnir tashkil etildi.
Yuqori saviyada bo‘lib o‘tgan mazkur musobaqa boksning AIBA toifasi qoidalari bo‘yicha o‘tkazilib, unda turli vaznlarda 14 yoshdan 18 yoshgacha bo‘lgan yoshlar o‘zaro kuch sinashdi. Qizg‘in va murosasiz kechgan mazkur bellashuvda uchinchi o‘rinni Respublika o‘g‘il bolalar o‘quv-tarbiya muassasasi va Toshkent "Temurbeklar maktabi" jamoalari qo‘lga kiritdi. Ikkinchi o‘rinni esa Toshkent shahar 23-sonli mehribonlik uyi jamoasi egalladi. Faxriy birinchilikka Toshkent shahar 22-sonli mehribonlik uyi jamoasi sazovor bo‘ldi. G‘oliblarga ko‘chma kubok, diplom hamda esdalik sovg‘alari topshirildi.
