BOLAJONLAR QUVONCHI - BIZNING BAXTIMIZ
1 iyun – Xalqaro bolalarni himoya qilish kuni munosabati bilan bolajonlarga bayramona kayfiyat ulashish maqsadida Milliy gvardiya Navoiy viloyati bo‘yicha boshqarmasi harbiy xizmatchi va xodimlari tomonidan Navoiy shahridagi “Mehribonlik uyi”da bayram tadbiri tashkil etildi.
Unda tarbiyalanuvchilar 5 ta tashabbus doirasida tezkorlik, epchillik, mohirlik, topqirlik kabi qobiliyatlarini sport sohasida sinab ko‘rdilar. Ayniqsa, xodimlarning ham bolajonlar bilan shaxmat bo‘yicha bellashganlari tadbir ishtirokchilarida katta taassurot qoldirdi. Tarbiyalanuvchilar orasida harbiy sohaga qiziqishi bo‘lgan yoshlar bundan juda mamnun bo‘lishdi.
Bu kabi tadbirlar yoshlarni ona Vatanga muhabbat va sadoqat ruhida tarbiyalashga xizmat qilishi shubhasiz ekanligi bilan bir qatorda, ularga vaqt ajratish, bo‘sh vaqtlarini mazmunli tashkil etish hamda kasbga yo‘naltirishda ham muhim ahamiyatga ega.
-O‘ylaymanki, tarbiyalanuvchilar ichidan kelajakda yurt posbonlari va o‘z sohasining yetuk mutaxassislari yetishib chiqadi, -deydi podpolkovnik Sodiq Mansurov.
Darhaqiqat, bolalar bizning kelajagimiz. Ularning baxtu saodati uchun sharoit yaratib berish esa bizning oliy burchimizdir.
