BOLALARNING BO‘Sh VAQTI MAZMUNLI O‘TKAZILMOQDA.
Mamlakatimizda yoshlarimizning qalbidagi vatanparvarlik tuyg‘ularini hamda ona Vatanimizga bo‘lgan muhabbatlarini yana-da kuchaytirish, bo‘sh vaqtlarini mazmunli o‘tkazish maqsadida bir qator maqsadli ishlar amalga oshirilmoqda.
Jumladan, Milliy gvardiya Farg‘ona viloyati bo‘yicha boshqarmasida Marg‘ilon shahrida joylashgan 1-sonli Mehribonlik uyi tarbiyalanuvchilari ishtirokida ochiq eshiklar kuni bo‘lib o‘tdi. Mazkur tadbirda Mehribonlik uyining 82 nafar yoshlari ishtirok etishdi.
Tashrif davomida yoshlar harbiy qismda yaratilgan shart-sharoitlar bilan tanishishdi. Sport mashg‘ulotlari uchun ajratilgan maydonlarda harbiy xizmatchilar bilan birgalikda mashg‘ulotlar o‘tkazishdi.
Shu bilan birgalikda Milliy gvardiya faoliyatida asosiy eʼtiborlardan biri hisoblangan Qora bayir zotli otlar ishtirokida o‘tkazilgan chiqishlar ham yoshlarning ot sportiga bo‘lgan qiziqishlarini uyg‘otdi.
Tadbir jarayonidagi harbiy xizmatchilarning ko‘rgazmali chiqishlari, harbiy texnika va qurol-aslahalar namoyishi, yoshlarning qalbida “Men ham vatan himoyachisi bo‘laman” degan oliy maqsad joy olishiga xizmat qildi.
