BOLAJONLAR QALBIDA BIR OLAM QUVONCH
Yoshlarimizning bo‘sh vaqtlarini mazmunli tashkil etish, ularni turli sport to‘garaklariga jalb etish orqali iqtidorlarini ro‘yobga chiqarish borasida mamlakatimiz bo‘ylab ko‘plab tadbirlar tashkil etilmoqda.
O‘zbekiston Respublikasi Milliy gvardiyasi tomonidan yoshlarimizning har tomonlama barkamol, jasur, mard va sog‘lom bo‘lib yetishishlari uchun keng qamrovli ijtimoiy ahamiyatli dasturlar amalga oshirilmoqda.
1-iyun Xalqaro bolalarni himoya qilish kuni munosabati bilan poytaxtimizning barcha mehribonlik uylaridan 100 ga yaqin tarbiyalanuvchilari ishtirokida Milliy gvardiya kavaleriya eskadroni majmuasida “Yoshlar kelajagimiz” shiori ostida ochiq eshiklar kuni bo‘lib o‘tdi.
Faxriy qorovul kavaleriya eskadroni harbiy xizmatchilari o‘zlariga biriktirilgan xizmat otlari bilan amalga oshirgan ko‘rgazmali chiqishlari yoshlarda katta taassurot qoldirdi.
Shundan so‘ng, professional ot sporti ustalari tomonidan ot minish va uni parvarishlash sirlari borasida yoshlarga mahorat darslari o‘tkazildi. Bu esa o‘z navbatida tarbiyalanuvchilarda ot sportiga bo‘lgan mehrini yana-da ortishiga sabab bo‘lgan bo‘lsa ajab emas.
Shuningdek, mazkur tadbir besh muhim tashabbus doirasidagi yo‘nalishlarni o‘z ichiga qamrab olgan bo‘lib, bolalar unda sportning shaxmat-shashka hamda stol tennisi turlari bo‘yicha o‘tkazilgan musobaqalarda o‘z mahoratini sinab ko‘rib, kitobxonlik tanlovida qanchalik badiiy adabiyotga oshno ekanliklarini namoyon etishdi.
Ochiq osmon uzra yaxshi niyatlar bilan uchirilgan kabutar va ezgu tilaklar bitilgan pufaklar bolajonlarga ko‘tarinki kayfiyat bag‘ishladi.
