Bolajonlar “O‘zbekiston bo‘ylab sayohat qil” dasturi doirasida go‘zal va navqiron Samarqandga tashrif buyurdi.
Davlatimiz Rahbarining “Ichki turizm xizmatlarini diversifikatsiya qilishga oid qo‘shimcha chora-tadbirlar to‘g‘risida” gi qarori ijrosini taʼminlash hamda O‘zbekiston Respublikasi Milliy gvardiyasi harbiy xizmatchi va xodimlari farzandlarining kuzgi taʼtil vaqtlarini mazmunli tashkil etish maqsadida joriy yilning 13 noyabr kuni 50 nafar bolajonlar uchun Samarqand shahri bo‘ylab ekskursiya tashkil etildi.
Erta tongdan Samarqand shahri tomon yo‘l olgan bolalar avtobusi xavfsizlik qoidalariga rioya etgan holda o‘rnatilgan tartibda kuzatib borildi. Yo‘l-yo‘lakay sayohat ishtirokchilari madaniy hordiq chiqarishlari, foydali maʼlumotlarga ega bo‘lishlari uchun intellektual o‘yinlar tashkil etildi.
Samarqand turizm markazi – qadim zaminning ushbu zamonaviy maskani sayohat ishtirokchilarining dastlabki manzili bo‘ldi. Har qanday sayyohni qadimiy afsonalar olamiga, tarixiy obidalar dunyosiga olib kiradigan tom maʼnodagi noyob loyiha hisoblanuvchi markaz hududida qurilgan “Boqiy shahar” meʼmoriy ansambli bolajolarda katta taassurot qoldirdi desak mubolag‘a bo‘lmaydi.
Bolajonlar tashrif buyurgan boshqa maskanlar – “Registon” maydoni, “Hazrati xizr majmuasi”, “Go‘ri Amir maqbarasi” tarixiy yodgorliklari bo‘ylab sayohatdan bir olam yorqin xotiralar, ruhiy kuch va maʼnaviy ozuqa oldilar.
