Болажонлар “Ўзбекистон бўйлаб саёҳат қил” дастури доирасида гўзал ва навқирон Самарқандга ташриф буюрди.
Давлатимиз Раҳбарининг “Ички туризм хизматларини диверсификация қилишга оид қўшимча чора-тадбирлар тўғрисида” ги қарори ижросини таъминлаш ҳамда Ўзбекистон Республикаси Миллий гвардияси ҳарбий хизматчи ва ходимлари фарзандларининг кузги таътил вақтларини мазмунли ташкил этиш мақсадида жорий йилнинг 13 ноябрь куни 50 нафар болажонлар учун Самарқанд шаҳри бўйлаб экскурсия ташкил этилди.
Эрта тонгдан Самарқанд шаҳри томон йўл олган болалар автобуси хавфсизлик қоидаларига риоя этган ҳолда ўрнатилган тартибда кузатиб борилди. Йўл-йўлакай саёҳат иштирокчилари маданий ҳордиқ чиқаришлари, фойдали маълумотларга эга бўлишлари учун интеллектуал ўйинлар ташкил этилди.
Самарқанд туризм маркази – қадим заминнинг ушбу замонавий маскани саёҳат иштирокчиларининг дастлабки манзили бўлди. Ҳар қандай сайёҳни қадимий афсоналар оламига, тарихий обидалар дунёсига олиб кирадиган том маънодаги ноёб лойиҳа ҳисобланувчи марказ ҳудудида қурилган “Боқий шаҳар” меъморий ансамбли болажоларда катта таассурот қолдирди десак муболаға бўлмайди.
Болажонлар ташриф буюрган бошқа масканлар – “Регистон” майдони, “Ҳазрати хизр мажмуаси”, “Гўри Амир мақбараси” тарихий ёдгорликлари бўйлаб саёҳатдан бир олам ёрқин хотиралар, руҳий куч ва маънавий озуқа олдилар.
