BOSHQARMA BOSHLIG‘INING KUBOGI
Sportning “Qo‘l jangi” turini keng targ‘ib qilish, jamiyatda sog‘lom turmush tarzini shakllantirish, yoshlarda mardlik va vatanparvarlik, ona Vatanga sadoqat tuyg‘ularini kamol toptirish maqsadida harbiy xizmatchilar hamda xodimlar bilan hamkorlikda joylarda yoshlar o‘rtasida muntazam ravishda bellashuvlar o‘tkazilmoqda.
Jumladan, Milliy gvardiya Navoiy viloyati bo‘yicha boshqarmasi tomonidan “Vatan taqdiri-mening taqdirim” shiori ostida sportning “qo‘l jangi” turi bo‘yicha boshqarma boshlig‘i kubogi musobaqasi o‘tkazildi.
Qizg‘in va murosasiz kechgan bahslarda yoshlar jismoniy ustunlik hamda epchilliklarini namoyon etdilar. Sportchilarning mahorati malakali hakamlar tomonidan baholab borildi.
Yakuniy natijalariga ko‘ra g‘olib deb topilgan sportchilar tashkilotchilar tomonidan diplom, medal' va qimmatbaho sovg‘alar bilan taqdirlanishdi. Jamoaviy hisobda 3-o‘rinni “Navbahor” jamoasi, 2-o‘rinni “Xatirchi” jamoasi hamda faxrli 1-o‘rinni “Nurota” terma jamoasi qo‘lga kiritib, boshqarma boshlig‘ining Kubogiga sazovor bo‘ldi.
Mazkur tadbir yoshlar uchun mahorat maktabi vazifasini bajarib, haqiqiy iqtidor egalarini saralab berdi.
