Joriy yilning 9-13 iyul kunlari Milliy gvardiya Buxoro viloyati bo’yicha boshqarmasi hududida Milliy gvardiyaning Respublika bo’yicha mutaxassis-kinologlari bilan navbatdagi o’quv yig’ini bo’lib o’tdi va unda “Mina qidiruv” yo’nalishi bo’yicha “Eng yaxshi kinolog” musobaqasi tashkillashtirildi.
Unda mutaxassis-kinologlar o’zlariga biriktirilgan 8 oylikdan 8 yoshgacha bo’lgan nemis va sharqiy yevropa ofcharkalari, labrador, Belgiya ofcharkasi (malinua) zotlariga mansub xizmat itlari bilan o’zaro ballashishdi.
Qiziqarli shartlardan iborat bellashuvlarda ishtirokchilar “Mina qidiruv” yo’nalishi to’rtta mashq bo’yicha bellashib, belgilangan qoidalarga ko‘ra: “To’siqlardan o’tish”; “Umumiy tayyorgarlik kursi bo’yicha” (o‘tir, tur, yonimga, yonimda, joyingda kabi imo-ishora va ovozli buyruqlar berish) mashqlar; “qurol yarog’ yoki portlovchi moddalarni qidirib topish yo’nalishi bo’yicha” mashqlar; “300 metrli masofaga to’siqlarni xizmat iti bilan o’tish mashqi” va “Dog biatloni – 1600 metr masofaga yakka tartibda qurol bilan yugurish” mashqlar vazifalarini yuqori aniqlikda bajarishdi.
Musobaqa mobaynida hakamlar tomonidan mutaxassis-kinologlarning jismoniy tayyorgarligi va kasbiy mahoratlari, shuningdek eng yaxshi kinologlar hamda lozim vazifalarni bajarish bo‘yicha xizmat itlarini tayyorgarlik darajasi baholab borildi.
Barcha harbiy qismlardan kelgan o’ttizga yaqin soha mutaxassislari sodiq doʻsti, jangovar hamrohi boʻlgan xizmat itlari bilan turli vazifalarni bajarish boʻyicha o’quv-yig’ini va musobaqa davomida bilim va koʻnikmalarini hamda kasbiy mahoratlarini oshirish imkoniyatiga ega boʻlishdi. Xizmat itlarining portlovchi moddalar va qurol-yaroqlarni izlab topishda alohida xususiyatlari va imkoniyatlari yuqori ekanligi nayomon bo’ldi.
Shuningdek, ushbu musobaqaning “To’siqlardan o’tish” yo’nalishi bo’yicha normativlar Milliy gvardiya Buxoro viloyati bo’yicha boshqarmasi hududida joylashgan xizmat itlari uchun mo’ljallangan pitomnikda (itlarni ko’paytirish va ularni mashg’ulotga o’gatiladigan joy) ilk bor o’tkazilib, bunda mutaxassis-kinologlar xizmat itlari bilan birgalikda yengil atletik bar’yer, taxtali devor, zinapoya, granata otish, emaklash okop va bumdan iborat to’siqlarni yengib o’tishdi.
Musobaqaning yakuniy natijalariga ko’ra, birinchi o’rinni Milliy gvardiya Buxoro viloyati bo’yicha boshqarmasi mutaxassis-kinologi qo’lga kiritdi, ikkinchi o’rinni Milliy gvardiya Toshkent viloyati bo’yicha boshqarmasi mutaxassis-kinologi egallagan bo’lsa, uchinchi o’rin esa Milliy gvardiya Namangan viloyati bo’yicha boshqarmasi mutaxassis-kinologiga nasib etdi.
G’olib bo’lgan mutaxassis-kinologlar tashkilotchilar tomonidan kubok, medall, diplom va qimmatbaho sovg’alari bilan munosib taqdirlandilar.
Bu kabi o’quv-yig’inining o’tkazilishi Milliy gvardiya mutaxassis-kinologlarning bilim va ko‘nikmalarini oshirishda, ularning kasbiy mahoratini baholashda, respublika va xalqaro musobaqalarda ishtirok etishida, kinologlarni tanlashda, amaliy tajriba orttirishda va mazkur sohada yuqori natijalarga erishishida zamin yaratiladi.