Жорий йилнинг 9-13 июль кунлари Миллий гвардия Бухоро вилояти бўйича бошқармаси ҳудудида Миллий гвардиянинг Республика бўйича мутахассис-кинологлари билан навбатдаги ўқув йиғини бўлиб ўтди ва унда “Мина қидирув” йўналиши бўйича “Энг яхши кинолог” мусобақаси ташкиллаштирилди.

Унда мутахассис-кинологлар ўзларига бириктирилган 8 ойликдан 8 ёшгача бўлган немис ва шарқий европа офчаркалари, лабрадор, Бельгия офчаркаси (малинуа) зотларига мансуб хизмат итлари билан ўзаро баллашишди.

Қизиқарли шартлардан иборат беллашувларда иштирокчилар “Мина қидирув” йўналиши тўртта машқ бўйича беллашиб, белгиланган қоидаларга кўра: “Тўсиқлардан ўтиш”; “Умумий тайёргарлик курси бўйича” (ўтир, тур, ёнимга, ёнимда, жойингда каби имо-ишора ва овозли буйруқлар бериш) машқлар; “қурол яроғ ёки портловчи моддаларни қидириб топиш йўналиши бўйича” машқлар; “300 метрли масофага тўсиқларни хизмат ити билан ўтиш машқи” ва “Дог биатлони – 1600 метр масофага якка тартибда қурол билан югуриш” машқлар вазифаларини юқори аниқликда бажаришди.

Мусобақа мобайнида ҳакамлар томонидан мутахассис-кинологларнинг жисмоний тайёргарлиги ва касбий маҳоратлари, шунингдек энг яхши кинологлар ҳамда лозим вазифаларни бажариш бўйича хизмат итларини тайёргарлик даражаси баҳолаб борилди.

Барча ҳарбий қисмлардан келган ўттизга яқин соҳа мутахассислари содиқ дўсти, жанговар ҳамроҳи бўлган хизмат итлари билан турли вазифаларни бажариш бўйича ўқув-йиғини ва мусобақа давомида билим ва кўникмаларини ҳамда касбий маҳоратларини ошириш имкониятига эга бўлишди. Хизмат итларининг портловчи моддалар ва қурол-яроқларни излаб топишда алоҳида хусусиятлари ва имкониятлари юқори эканлиги наёмон бўлди.

Шунингдек, ушбу мусобақанинг “Тўсиқлардан ўтиш” йўналиши бўйича нормативлар Миллий гвардия Бухоро вилояти бўйича бошқармаси ҳудудида жойлашган хизмат итлари учун мўлжалланган питомникда (итларни кўпайтириш ва уларни машғулотга ўгатиладиган жой) илк бор ўтказилиб, бунда мутахассис-кинологлар хизмат итлари билан биргаликда енгил атлетик баръер, тахтали девор, зинапоя, граната отиш, эмаклаш окоп ва бумдан иборат тўсиқларни енгиб ўтишди.

Мусобақанинг якуний натижаларига кўра, биринчи ўринни Миллий гвардия Бухоро вилояти бўйича бошқармаси мутахассис-кинологи қўлга киритди, иккинчи ўринни Миллий гвардия Тошкент вилояти бўйича бошқармаси мутахассис-кинологи эгаллаган бўлса, учинчи ўрин эса Миллий гвардия Наманган вилояти бўйича бошқармаси мутахассис-кинологига насиб этди.

Ғолиб бўлган мутахассис-кинологлар ташкилотчилар томонидан кубок, медалл, диплом ва қимматбаҳо совғалари билан муносиб тақдирландилар.

Бу каби ўқув-йиғинининг ўтказилиши Миллий гвардия мутахассис-кинологларнинг билим ва кўникмаларини оширишда, уларнинг касбий маҳоратини баҳолашда, республика ва халқаро мусобақаларда иштирок этишида, кинологларни танлашда, амалий тажриба орттиришда ва мазкур соҳада юқори натижаларга эришишида замин яратилади.