Buxoro shahrida Sportning Kurash turi bo‘yicha Milliy gvardiya birinchiligi musobaqasi bo‘lib o‘tdi
Joriy yilning 17-19 sentyabr kunlari O‘zbekiston Kurash federatsiyasi bilan hamkorlikda Buxoro tumani “Madaniyat” sport majmuasida kurash bo‘yicha Milliy gvardiya birinchiligi musobaqasi ko‘tarinki ruhda o‘tkazildi.
Musobaqada Milliy gvardiya tizimlarida faoliyat yuritib kelayotgan 200 yaqin harbiy xizmatchi va xodimlar jami 19 ta jamoalarda 7 ta vazn (60 kg, 66 kg, 73 kg, 81 kg, 90 kg, 100 kg, +100 kg) toifasida ishtirok etdi.
Qiziqarli va murosasiz kechgan bellashuvlarda harbiy xizmatchilar mardonavor kurashib, o‘z jamoasi sharafini munosib himoya qilishdi.
Musobaqa yakuniga ko‘ra 3-o‘rinni Milliy gvardiyaning 65921 harbiy qismi sportchilari qo‘lga kiritgan bo‘lsa, 2-o‘rin Milliy gvardiyaning Qo‘riqlash bosh boshqarmasiga nasib etdi. Faxrli 1-o‘rinni Milliy gvardiyaning Qoraqalpog‘iston Respublikasi bo‘yicha boshqarmasi sportchilari egalladi.
Musobaqa g‘oliblarini munosib rag‘batlantirishga bag‘ishlangan tantanali tadbirda Sport vaziri o‘rinbosari Sh.Maxmudov ishtirok etib barcha sportchi va ularning murabbiylariga shuningdek, muxlislik qilayotgan yosh sport ixlosmandlariga o‘zining samimiy tilaklarini bildirdi. Tashkilotchilar tomonidan g‘olib va sovrindorlarga medallar, diplom hamda musobaqa kubogi tantanali ravishda topshirildi.
