Бухоро шаҳрида Спортнинг Кураш тури бўйича Миллий гвардия биринчилиги мусобақаси бўлиб ўтди
Жорий йилнинг 17-19 сентябрь кунлари Ўзбекистон Кураш федерацияси билан ҳамкорликда Бухоро тумани “Маданият” спорт мажмуасида кураш бўйича Миллий гвардия биринчилиги мусобақаси кўтаринки руҳда ўтказилди.
Мусобақада Миллий гвардия тизимларида фаолият юритиб келаётган 200 яқин ҳарбий хизматчи ва ходимлар жами 19 та жамоаларда 7 та вазн (60 кг, 66 кг, 73 кг, 81 кг, 90 кг, 100 кг, +100 кг) тоифасида иштирок этди.
Қизиқарли ва муросасиз кечган беллашувларда ҳарбий хизматчилар мардонавор курашиб, ўз жамоаси шарафини муносиб ҳимоя қилишди.
Мусобақа якунига кўра 3-ўринни Миллий гвардиянинг 65921 ҳарбий қисми спортчилари қўлга киритган бўлса, 2-ўрин Миллий гвардиянинг Қўриқлаш бош бошқармасига насиб этди. Фахрли 1-ўринни Миллий гвардиянинг Қорақалпоғистон Республикаси бўйича бошқармаси спортчилари эгаллади.
Мусобақа ғолибларини муносиб рағбатлантиришга бағишланган тантанали тадбирда Спорт вазири ўринбосари Ш.Махмудов иштирок этиб барча спортчи ва уларнинг мураббийларига шунингдек, мухлислик қилаётган ёш спорт ихлосмандларига ўзининг самимий тилакларини билдирди. Ташкилотчилар томонидан ғолиб ва совриндорларга медаллар, диплом ҳамда мусобақа кубоги тантанали равишда топширилди.
