Mamlakatimizda yoshlarning huquq va manfaatlarini taʼminlash, ularni kamol toptirish davlatimiz siyosatining eng ustuvor yoʻnalishlaridan biri hisoblanadi. Bu borada bir qator qarorlar ishlab chiqilib, undagi vazifalar amaliyotga joriy etilmoqda.
Prezidentimizning 2024-yil 5-fevraldagi tegishli qarori bilan, maktablarda Milliy gvardiya zimmasiga oʻquvchilarning davomatini yaxshilash, huquqbuzarlik va jinoyatlarning oldini olish kabi vazifalar yuklatildi. Hozirda mazkur topshiriqlarni ijrosini taʼminlash borasida manzilli ishlar yoʻlga qoʻyilgan. Milliy gvardiya Markaziy devonida Milliy gvardiya qoʻmondonligi, Maktabgacha va maktab taʼlimi vazirligi, Tashqi ishlar vazirligi, Oʻzbekiston yoshlari umumjahon assotsiatsiyasi, Oʻzbekiston yoshlar ishlari agentligi hamkorligida xorijga ota-onalari tomonidan olib chiqib ketilgan oʻquvchilarni taʼlim olishini taʼminlashga qaratilgan on-layn konferens aloqa shaklidagi yoshlar bilan uchrashuv ham yuqoridagi saʼy-harakatlarning mantiqiy davomidir desak mubolagʻa boʻlmaydi.

Chet davlatiga ketgan oʻquvchi yoshlar tahlil qilinganda, hozirda 4 289 nafar maktab oʻquvchilari chet davlatlarida boʻlib, ularning 570 nafari maktab taʼlimiga jalb etilmagan. Shu sababli boʻlib oʻtgan mazkur onlayn videomuloqotda Rossiya, Turkiya, Xorvatiya, Janubiy Koreya va Markaziy Osiyo davlatlaridan ishtirok etgan 150 nafardan ortiq maktab oʻquvchilari, ularning ota-onalari hamda uyushmagan yoshlar bilan hamkorlik oʻrnatib, ularni taʼlimga qaytish borasida suhbatlashildi.
Tadbir davomida muammoli masalalar bilan murojaat qilgan 31 nafar yoshlarning Oʻzbekiston Respublikasiga qaytish va umumiy oʻrta taʼlimni davom ettirish toʻgʻrisidagi muammolarini qisqa muddatda hal etish yuzasidan kelishib olindi.