Davlatimiz rahbarining “2025 yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yana-da oshirish chora-tadbirlari to‘g‘risida”gi Qarori ijrosini taʼminlash yuzasidan Milliy gvardiya qo‘mondoni general-mayor R. Djurayev boshchiligidagi ishchi guruh Buxoro viloyatida o‘z faoliyatini boshladi
Muhtaram Prezidentimiz tomonidan mamlakatimizda tinchlik va osoyishtalikni taʼminlashga alohida eʼtibor qaratilib joriy yilning 3 yanvar kuni “2025 yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yana-da oshirish bo‘yicha chora-tadbirlar to‘g‘risida”gi muhim va tarixiy qaror imzolandi.
Topshiriqqa asosan qarorning ijrosini tashkil etish bo‘yicha Milliy gvardiya qo‘mondoni general-mayor R.Djurayev boshchiligidagi ishchi guruh Buxoro viloyatida o‘z faoliyatini boshladi.
Buxoro viloyati bo‘yicha Milliy gvardiyaning Qo‘riqlash boshqarmasida hamkor vazirlik va tashkilotlar masʼullari hamda Viloyat hokimi B.Zaripov ishtirokida bo‘lib o‘tgan yig‘ilishda Milliy gvardiya qo‘mondoni R.Djurayev tomonidan mazkur Qarorning mazmun mohiyati yetkazilgan holda, ishchi guruhning asosiy maqsadi va faoliyati doirasidagi vazifalar bilan tanishtirildi. O‘z navbatida viloyat hokimi ham Davlatimiz rahbarining topshiriqlari ijrosini taʼminlanishi yuzasidan zarur ko‘rsatmalar berib o‘tdi.
Shuningdek, Qaror talablaridan kelib chiqib, viloyatning har bir tuman va mahallalariga Milliy gvardiya, ichki ishlar organlari, prokuratura, hokimiyat hamda aloqador tashkilotlarning masʼullari biriktirildi.
Shundan so‘ng Milliy gvardiya qo‘mondoni boshchiligidagi ishchi guruhning manzilli ishlari Buxoro va Kogon shaharlari, shuningdek Buxoro tumanlarida davom ettirildi.
Mahalla yettiligi va sektor rahbarlari bilan bo‘lib o‘tgan uchrashuvlarda, Qarorning mazmun mohiyati tushuntirilib, o‘tgan yilda jinoyat sodir etilgan har bir mahallarda kriminogen vaziyatni barqarorlashtirish, mahallalar kesimida manzilli chora-tadbirlar belgilangan holda mahalla-tuman-viloyat darajasida uning ijrosi uchun bevosita masʼul rahbarlarni biriktirish va aniq sohaviy javobgarlikni yuklash, ilmiy-amaliy yondashuvlar asosida joylarga chiqqan holda maqsadli o‘rganishlarni o‘tkazish orqali huquqbuzarliklarga sabab bo‘layotgan asl omillarni aniqlash va barham berish bo‘yicha tashkiliy-huquqiy choralarni ko‘rish, mahallalarda yoshlar, ayollar va ishsizlar tomonidan, shuningdek, oila-turmush munosabatlari doirasida sodir etiladigan jinoyatlarning oldini olishda “mahalla yettiligi” har bir vakilining aniq masʼuliyatini belgilandi.
Shuningdek, Prezidentining “O‘zbekiston — 2030” strategiyasida belgilangan ustuvor maqsadlarga erishish, O‘zbekiston Respublikasining “Huquqbuzarliklar profilaktikasi to‘g‘risida”gi Qonuni hamda Jamoat xavfsizligi konsepsiyasida belgilangan ustuvor vazifalarning amaliy ijrosini taʼminlash bo‘yicha masʼullarga topshiriqlar berildi.
