Davlat mukofotlari o‘z egalariga topshirildi
O‘zbekiston Respublikasi Prezidentining Farmoni bilan Qurolli Kuchlarimiz tashkil etilganining 33 yilligi va 14 yanvar – Vatan himoyachilari kuni munosabati bilan bir qator harbiy xizmatchi va xodimlar yuksak Davlat mukofotlari bilan taqdirlandi. Ushbu mukofotlarni vazirlik va idoralarda tantanali topshirish marosimlari o‘tkazilmoqda.
Xususan, Milliy gvardiya tizimlarida o‘z burchiga sadoqat va namunali xizmat qilib kelayotgan bir guruh harbiy xizmatchi va xodimlarni, xizmat vaqtida mardlik ko‘rsatib halok bo‘lgan safdoshlarimizning yaqinlarini munosib taqdirlash maqsadida tantanali tadbir tashkil etildi.
Tadbirda Milliy gvardiya qo‘mondoni tomonidan barcha tizim faxriylari, harbiy xizmatchi va xodimlarni “Yangi O‘zbekiston armiyasi – mamlakat tayanchi, xalqimiz faxri!” shiori ostida o‘tkazilayotgan bayram bilan samimiy muborakbod etib, mamlakatimizda amalga oshirilayotgan islohotlar natijasida Milliy gvardiya inson huquqlari va manfaatlarining chinakam himoyachisi, jamiyat va davlat xavfsizligining ishonchli posboni sifatida chin maʼnoda xalqimiz faxriga aylanganini eʼtirof etildi.
Qolaversa, yangi 2025 yilda bo‘linmalarning jangovar shayligini yuqori darajada ushlab turish, jamoat tartibini saqlash, jismoniy va yuridik shaxslarni mol-mulkini ishonchli qo‘riqlash, yuksak salohiyatli harbiy kadrlarni tayyorlash hamda yoshlarni harbiy vatanparvarlik ruhida tarbiyalash borasidagi ishlarni jadallashtirish lozimligi taʼkidlandi.
Tadbir davomida Davlatimiz rahbari Farmoni bilan Milliy gvardiya tizimida xizmat olib borayotgan 9 nafar harbiy xizmatchi va xodimlarga “Do‘stlik” ordeni, “Jasorat”, “Sog‘lom turmush”, “Sodiq xizmatlari uchun” va “Shuhrat” medallari tantanali ravishda topshirildi.
Shuningdek, Milliy gvardiya qo‘mondonining buyrug‘i bilan safdoshlariga namuna bo‘lib kelayotgan va “Burch, Sadoqat, Jasorat” shiori ostida xizmat burchiga masʼuliyat bilan yondashayotgan bir guruh harbiy xizmatchi va xodimlar ko‘krak nishonlari, faxriy yorliq hamda qimmatbaho sovg‘alar bilan munosib taqdirlandilar.
Shundan so‘ng Milliy gvardiya qo‘mondoni va o‘rinbosarlari, faxriylar hamda taqdirlangan shaxsiy tarkib orkestr sadosi ostida xizmat vazifasini bajarish chog‘ida jasorat ko‘rsatib, qahramonlarcha halok bo‘lgan safdoshlarimiz nomlari bitilgan “Xotira maydoniga” gul qo‘yishdi.
