Ўзбекистон Республикаси Президентининг Фармони билан Қуролли Кучларимиз ташкил этилганининг 33 йиллиги ва 14 январь – Ватан ҳимоячилари куни муносабати билан бир қатор ҳарбий хизматчи ва ходимлар юксак Давлат мукофотлари билан тақдирланди. Ушбу мукофотларни вазирлик ва идораларда тантанали топшириш маросимлари ўтказилмоқда.

Хусусан, Миллий гвардия тизимларида ўз бурчига садоқат ва намунали хизмат қилиб келаётган бир гуруҳ ҳарбий хизматчи ва ходимларни, хизмат вақтида мардлик кўрсатиб ҳалок бўлган сафдошларимизнинг яқинларини муносиб тақдирлаш мақсадида тантанали тадбир ташкил этилди.

Тадбирда Миллий гвардия қўмондони томонидан барча тизим фахрийлари, ҳарбий хизматчи ва ходимларни “Янги Ўзбекистон армияси – мамлакат таянчи, халқимиз фахри!” шиори остида ўтказилаётган байрам билан самимий муборакбод этиб, мамлакатимизда амалга оширилаётган ислоҳотлар натижасида Миллий гвардия инсон ҳуқуқлари ва манфаатларининг чинакам ҳимоячиси, жамият ва давлат хавфсизлигининг ишончли посбони сифатида чин маънода халқимиз фахрига айланганини эътироф этилди.

Қолаверса, янги 2025 йилда бўлинмаларнинг жанговар шайлигини юқори даражада ушлаб туриш, жамоат тартибини сақлаш, жисмоний ва юридик шахсларни мол-мулкини ишончли қўриқлаш, юксак салоҳиятли ҳарбий кадрларни тайёрлаш ҳамда ёшларни ҳарбий ватанпарварлик руҳида тарбиялаш борасидаги ишларни жадаллаштириш лозимлиги таъкидланди.

Тадбир давомида Давлатимиз раҳбари Фармони билан Миллий гвардия тизимида хизмат олиб бораётган 9 нафар ҳарбий хизматчи ва ходимларга “Дўстлик” ордени, “Жасорат”, “Соғлом турмуш”, “Содиқ хизматлари учун” ва “Шуҳрат” медаллари тантанали равишда топширилди.

Шунингдек, Миллий гвардия қўмондонининг буйруғи билан сафдошларига намуна бўлиб келаётган ва “Бурч, Садоқат, Жасорат” шиори остида хизмат бурчига масъулият билан ёндашаётган бир гуруҳ ҳарбий хизматчи ва ходимлар кўкрак нишонлари, фахрий ёрлиқ ҳамда қимматбаҳо совғалар билан муносиб тақдирландилар.

Шундан сўнг Миллий гвардия қўмондони ва ўринбосарлари, фахрийлар ҳамда тақдирланган шахсий таркиб оркестр садоси остида хизмат вазифасини бажариш чоғида жасорат кўрсатиб, қаҳрамонларча ҳалок бўлган сафдошларимиз номлари битилган “Хотира майдонига” гул қўйишди.