Mazkur uchrashuvda, Milliy gvardiya qo‘mondoni R.Djurayev,   Maktabgacha va maktab taʼlimi vaziri X.Umarova hamda sohaga oid mutasaddi rahbarlar ishtirok etishdi.

Ochiq muloqot tarzida bo‘lib o‘tgan davra suhbati mobaynida o‘quvchilarning darslardagi davomati bilan bog‘liq mavjud muammolar hamda ularning yechimi muhokama qilinib, dastlabki o‘rganishlar nitajasida elektron platformaga kiritilgan davomat maʼlumotlari bilan sinflardagi real davomat o‘rtasida namoyon bo‘layotgan tafovutlarni ham o‘z vaqtida bartaraf etish yuzasidan alohida vazifalar belgilandi.

Shuningdek  o‘quvchilarni  vatanparvarlik ruhida tarbiyalash orqali ularda “huquqbuzarlikka qarshi immunitet” yaratish borasidagi hamkorlikdagi chora-tadbirlarga alohida eʼtibor qaratildi.

  Uchrashuvda, Davlatimiz rahbari tomonidan belgilab berilgan vazifalar yodga olinib,  ota-onalar va mahalla raislarining bu boradagi masʼuliyatini oshirishga hamda “Maktab – ota-ona – mahalla” zanjiri asosida elektron muloqot platformasini ishga tushirish borasidagi masalalar belgilab olindi.

 Bu borada, maktab taʼlimi bo‘yicha ota-onada masʼuliyat, o‘qituvchida majburiyat, o‘quvchida ishonch, taʼlim va tarbiyada sifat, mahallada esa nazorat bo‘lishi uchun yangicha tizim yaratilishi va hamkorlikda amalga oshiriladigan ishlar  muxokama qilindi.

 Xususan, o‘quvchilarning bo‘sh vaqtini mazmunli o‘tkazish va kasbga yo‘naltirish, tarbiyasi va o‘qishida muammo bo‘lgan o‘quvchilarning ota-onalari va mahalla faollari bilan birga ishlab, mavjud muammolarni keng jamoatchilik vakillari bilan yechishga qaratilgan aniq choralarni ko‘rish muhimligi qayd etildi.

Shuningdek, maktablarda faoliyat yuritib kelgan inspektor-psixolog shtatlarini Milliy gvardiya tizimiga o‘tkazilganligi munosabati bilan ularning xizmat vazifalarini to‘laqonli bajarishini taʼminlashga qaratilgan maqsadli chora-tadbirlar bo‘yicha soxaga oid mutasaddi rahbarlarga tegishliligi bo‘yicha topshiriqlar berildi.