Davlatimiz rahbarining topshiriqlarini amaliy ijrosini taʼminlash maqsadida Milliy gvardiya qo‘mondoni general-mayor R.Djurayev boshchiligidagi idoralararo ishchi guruh Buxoro viloyatida o‘z faoliyatini boshladi. Ishchi guruh tomonidan viloyat aholisining muammolarini aniqlash va hal etish hamda kriminogen vaziyat barqarorligini taʼminlashga asosiy eʼtibor qaratilgan.
Bugun, hokimiyat binosida Milliy gvardiya qo‘mondoni general-mayor R.Djurayev va viloyat hokimi B.Zaripovlar raisligida idoralararo ishchi guruh tarkibi, sohaga oid vazirlik hamda tashkilotlar, shuningdek, mahalliy Davlat organlari mutasaddi rahbarlari ishtirokida yig‘ilish bo‘lib o‘tdi.
Yig‘ilishda Muhtaram Prezidentimiz tomonidan hududlarda aholi muammolarini aniqlash va hal etish, energetika va oziq-ovqat taʼminoti, shuningdek, kriminogen vaziyatga taʼsir etuvchi ijtimoiy-maishiy muammolarni o‘rganish hamda ularni bartaraf etish choralarini ko‘rish kabi belgilangan vazifalar yuzasidan Milliy gvardiya, Ichki ishlar vazirligi, Adliya vazirligi, Bosh prokuratura, uning huzuridagi Departament va Soliq qo‘mitasi rahbar va masʼul xodimlaridan iborat ishchi guruh shakllantirildi va tegishliligi bo‘yicha topshiriqlar berildi.
Idoralararo ishchi guruh, tasdiqlangan reja hamda belgilangan vazifalarni amaliy ijrosini taʼminlash maqsadida tumanlarga chiqib, mahallalar kesimida o‘rganish ishlarini boshlashdi.
Xususan, Milliy gvardiya qo‘mondoni ishchi guruh tarkibidagi mutasaddi rahbarlar bilan birgalikda joylarga chiqib, aholini, ayniqsa mahallalarda ayollarning bandligini taʼminlashga qaratilgan ishlar, Monomarkazlar faoliyati va tadbirkorlar uchun yaratilgan imkoniyatlar, shuningdek, yoshlarni taʼlim-tarbiyasi, ularni harbiy vatanparvarlik ruhida tarbiyalashga qaratilgan chora-tadbirlar hamda sport bilan shug‘ullanishlari uchun dasturlarda belgilangan vazifalar ijrosi, jumladan sport maktablari, shuningdek maktablarda faoliyati yo‘lga qo‘yilgan sport seksiyalari hamda to‘garaklar misolida o‘rganildi.
Tadbir davomida aniqlangan kamchiliklar va ularni yechimi yuzasidan masʼul rahbarlarga zarur ko‘rsatma hamda topshiriqlar berildi.
Idoralararo ishchi guruh faoliyati Buxoro viloyatida davom etmoqda.
