Давлатимиз раҳбарининг топшириқларини амалий ижросини таъминлаш мақсадида Миллий гвардия қўмондони генерал-майор Р.Джураев бошчилигидаги идоралараро ишчи гуруҳ Бухоро вилоятида ўз фаолиятини бошлади. Ишчи гуруҳ томонидан вилоят аҳолисининг муаммоларини аниқлаш ва ҳал этиш ҳамда криминоген вазият барқарорлигини таъминлашга асосий эътибор қаратилган.
Бугун, ҳокимият биносида Миллий гвардия қўмондони генерал-майор Р.Джураев ва вилоят ҳокими Б.Зариповлар раислигида идоралараро ишчи гуруҳ таркиби, соҳага оид вазирлик ҳамда ташкилотлар, шунингдек, маҳаллий Давлат органлари мутасадди раҳбарлари иштирокида йиғилиш бўлиб ўтди.
Йиғилишда Муҳтарам Президентимиз томонидан ҳудудларда аҳоли муаммоларини аниқлаш ва ҳал этиш, энергетика ва озиқ-овқат таъминоти, шунингдек, криминоген вазиятга таъсир этувчи ижтимоий-маиший муаммоларни ўрганиш ҳамда уларни бартараф этиш чораларини кўриш каби белгиланган вазифалар юзасидан Миллий гвардия, Ички ишлар вазирлиги, Адлия вазирлиги, Бош прокуратура, унинг ҳузуридаги Департамент ва Солиқ қўмитаси раҳбар ва масъул ходимларидан иборат ишчи гуруҳ шакллантирилди ва тегишлилиги бўйича топшириқлар берилди.
Идоралараро ишчи гуруҳ, тасдиқланган режа ҳамда белгиланган вазифаларни амалий ижросини таъминлаш мақсадида туманларга чиқиб, маҳаллалар кесимида ўрганиш ишларини бошлашди.
Хусусан, Миллий гвардия қўмондони ишчи гуруҳ таркибидаги мутасадди раҳбарлар билан биргаликда жойларга чиқиб, аҳолини, айниқса маҳаллаларда аёлларнинг бандлигини таъминлашга қаратилган ишлар, Мономарказлар фаолияти ва тадбиркорлар учун яратилган имкониятлар, шунингдек, ёшларни таълим-тарбияси, уларни ҳарбий ватанпарварлик руҳида тарбиялашга қаратилган чора-тадбирлар ҳамда спорт билан шуғулланишлари учун дастурларда белгиланган вазифалар ижроси, жумладан спорт мактаблари, шунингдек мактабларда фаолияти йўлга қўйилган спорт секциялари ҳамда тўгараклар мисолида ўрганилди.
Тадбир давомида аниқланган камчиликлар ва уларни ечими юзасидан масъул раҳбарларга зарур кўрсатма ҳамда топшириқлар берилди.
Идоралараро ишчи гуруҳ фаолияти Бухоро вилоятида давом этмоқда.
