Davlatimiz rahbarining "Mahallalarda yoshlar bilan ishlash tizimini tubdan takomillashtirish chora-tadbirlari to‘g‘risida"gi qaroriga binoan mahalla yoshlari yetakchisi lavozimida o‘z faoliyatini yuritib kelayotgan Milliy gvardiya harbiy xizmatchi va xodimlari ishtirokida videoselektor yig‘ilishi bo‘lib o‘tdi
Bugungi kunda O‘zbekiston Respublikasi Milliy gvardiyasi va Yoshlar ishlari agentligi bilan hamkorlikda yoshlarni harbiy vatanparvarlik ruhida tarbiyalash, yoshlarga oid davlat siyosatini yuritish, yoshlarni muammo va takliflarini ijobiy hal etish hamda ularga yetarli shart-sharoitlar yaratib berish bo‘yicha hamkorlikdagi tizimli ishlar yo‘lga qo‘yildi.
Ushbu masalalar yuzasidan Milliy gvardiya qo‘mondoni o‘rinbosari polkovnik S.Mamayusupov raisligida respublikamiz bo‘ylab Milliy gvardiya tizimidan mahalladagi yoshlar yetakchisi lavozimiga safarbar etilgan 36 nafar harbiy xizmatchi va xodimlar ishtirokida videoselektor yig‘ilishi o‘tkazildi.
Yig‘ilishda mahalladagi yoshlar yetakchilarining asosiy vazifalari, ularga beriladigan imtiyozlar hamda rag‘batlantirishlar bo‘yicha maʼlumotlar yetkazildi.
Qaror bilan namuna bo‘layotgan Yetakchilar "Yangi O‘zbekiston islohotchisi" ko‘krak nishoni bilan taqdirlanishi alohida taʼkidlab o‘tildi.
Shuningdek, bugungi kunda o‘z faoliyatini mahalla yoshlari yetakchisi lavozimida davom ettirib kelayotgan harbiy xizmatchi(xodim)lar doimo Milliy gvardiya qo‘mondonligi eʼtiborida bo‘lishi tushuntirib o‘tildi. Yig‘ilish yakunida barcha yoshlar yetakchilariga masʼuliyatli va sharafli xizmatlari mobaynida kuch-quvvat, metin iroda, mustahkam sog‘lik va ulkan zafarlar tilab, hamkorlikdagi ishlarni yuqori bosqichga olib chiqishlariga tavsiyalar berildi.
